Ómirimdi altyn tıyndar saqtap qaldy - maıdanger
Jarylǵysh zattyń synyqtary altyn tıyndarǵa tıip, maıdanger aman qaldy, dep habarlaıdy QazAqparat tilshisi.
Aqtóbe qalasynyń Qarǵaly aýyldyq okrýginde turatyn Ashat Faızýllın soǵys jyldaryndaǵy estelikterin aıtýdan jalyqqan emes. Ol 1942 jyly soǵysqa attanyp, 1945 jyldyń qyrkúıeginde elge oralǵan. 94 jastaǵy Ashat Faızýllın «Qyzyl juldyz» Ordenimen marapattalǵan.
«1942 jyly bizdiń batalondy Stalıngradqa jetkizdi. Kúni-túni júrip, Volga ózenin keship óttik. Ózen qyp-qyzyl qanǵa boıalǵan. Qala qıraǵan, tútinge tunshyǵyp tur eken. Úzdiksiz atysyp, bizden tek jeti adam qaldy. 1943 jyly tórtinshi Ýkraına shaıqasynyń ofıtserler quramynyń rezervinde boldym»,- dedi Ashat Faızýllın.
Soǵys ardageri jaralanyp, Erevandaǵy gospıtalda jatty. Birinshi Belorýssııa maıdanynda shaıqasty.
«Meni barlaýǵa jıi jiberetin. Bir kúni 3-4 metr qashyqtyqta bomba jarylyp, synyǵy meni jaralap ketti. Donbastan Erevanǵa jiberip, emdetti. Sol jerde soǵysqa jaramdy degen qorytyndy shyǵaryldy. Kenıngsbreg qalasyn azat etýge de qatystym. Kezekti shabýyl kezinde jarylǵysh zattyń synyǵy qolym men deneme tıgen edi. Sol kezde qaltamda polshalyq altyn tıyndar júrgen. Ómirimdi qutqaryp qalady dep kim oılaǵan? Máskeýge jiberip, 5 aıdan astam ýaqyt em aldym»,- dep eske aldy soǵys ardageri maıdan dalasyn.
Ardager Jeńis kúnin jıi eske alady. Sol kúni ol qýanyshty habardy kishkentaı baladan estip, jaýyngerlerge jetkizgen. Alǵashynda eshkim senbedi. Keıin bir-birin qushaqtap, quttyqtady.
«Soǵystan keıin taǵy bir jyl áskerı boryshymdy ótedim. Meni Japonııa soǵysyna baratyn eshelonmen jiberdi. Ol jerde shtabta jumys istedim. Dárigerler denemdegi oq izderin kórip, qatty tań qaldy. Elge 1945 jyldyń kúzinde kelip, zaýytta, azyq-túlik taratý mekemesinde eńbek ettim. Keıin men áskerı ýchılışege fotograf bolyp ornalastym»,- dedi A.Faızýllın. Soǵys ardageriniń erligi uzaq jyldar boıy umyt qalǵan eken. «Qyzyl juldyz» ordeni maıdangerge arada 60 jyl ótken soń tabys etilipti. Al búgin ony «Nur Otan» partııasynyń qalalyq fılıaly tóraǵasynyń birinshi orynbasary Muratbaı Ájibaev quttyqtap bardy.
«Nur Otan» partııasynyń músheleri men depýtattar, jasotandyqtar óńirdegi barlyq ardagerge qurmet kórsetip, Jeńis merekesimen quttyqtap, syılyqtar tapsyrdy.
Aıta keteıik, qazir oblysta 136 soǵys ardageri bar. Onyń 78-i Aqtóbe qalasynda turady. Bári úıli, baspanaly boldy. Qalalyq jumyspen qamtý jáne áleýmettik baǵdarlamalar bólimi Jeńis kúnine oraı soǵys ardageriniń árqaısysyna 122 myń teńgeden astam aqsha bólgen.