Ómirge degen kózqaras, maqsat barlyǵy 100% ózgerdi - Láılá Sultanqyzy jubaıynyń qazasy jaıly

ASTANA. QazAqparat – Tanymal telejúrgizýshi Láılá Sultanqyzy jubaıy Qaırat Berkinbaevtyń qazasynan 40 kún ótkennen keıin estelik vıdeo jarııalady. Ol onda joldasymen ótken ómirindegi jarqyn estelikterin eske alyp, qıyn jaǵdaıdaǵy ishki sezimi týraly aıtty, dep habarlaıdy QazAqparat tilshisi.

«Qaırattyń 40 kúni ótti. 40 kúnniń ishinde men ómirimdi deıin jáne keıin dep bóle alamyn. Sebebi, ómirge degen kózqaras, maqsat barlyǵy 100 paıyz ózgerdi. Qanshama jyl bir adammen bir shańyraq astynda turǵannan keıin, ómirdiń ystyǵy men sýyǵyn da birge kórgennen keıin adamda qımastyq, saǵynysh sezim bolady. Bul sezim 40 kúnnen keıin basqasha bolady dep aıta almaımyn. Ol jyldar boıy seniń jadyńda turady. Bul oqıǵa kezinde adam «Nege bul jaǵdaı menimen boldy?» dep izdene bastaıdy. Adam barlyǵyn túsinedi. Biraq qabyldaý degen dúnıege ýaqyt, tózim, sabyr kerek eken», - dedi Láılá Sultanqyzy.

Ol suhbat barysynda joldasymen birge ótken 16 jyl ómiri jadynda tek jaqsy esteliktermen qalǵanyn aıtty.

«Ol qatty erkeletti. Meniń joldastarym jylaǵanda «Biz onyń saǵan degen mahabbaty qandaı ekenin biletin edik qoı» dedi. Barlyǵyn aıtyp bergen ǵoı. «Bul qyzdyń artynan qansha júgirdim» dep. Ony jaqyn adamdardyń barlyǵy biledi. Qaıyn apalarym áli kúnge deıin sony aıtyp otyrady.

Men endi kúsh jınaýym kerek. Men tańdaıtyndaı jaǵdaıda emespin. Buryn erkelegen shyǵarmyn. Buryn bir qıyn jaǵdaı bolsa, qasymda Qaıratym bar dep jigerlenetinmin. Al qazir meniń jaýapkershiligim eki ese. Sebebi men eki balany ósirip, eshkimge jáýteńdetpeı, ákesiniń joqtyǵyn bildirmeýim kerek», - dep bólisti ol.

Láılá Sultanqyzy suhbat sońynda osy qıyn sátte qoldaý kórsetken barsha qazaqstandyqtarǵa alǵysyn bildirdi.

«Kóp nárse aıtqym-aq keledi ǵoı. Qaırekeń týraly jaqsy esteliktermen alda bólisermin. Biraq osy vıdeo arqyly alǵashqy ári tolyq aıtqanym bolsyn dep eseptedim. Ol ony qalamas edi. Kózi tiri bolǵanda ol ózi týraly aıtqyzbas edi», - dep suhbatty túıindedi Láılá Sultanqyzy.

Eske salaıyq, «Oq-Jetpes» emdeý-saýyqtyrý kesheniniń prezıdenti bolǵan Qaırat Berkinbaev 57 jasynda ómirden ozdy. Ol elimizge belgili qoǵamdyq densaýlyq saqtaý qaıratkeri, kýrort isiniń damýyna zor úles qosqan maman retinde tanymal.

Foto: Vıdeodan alynǵan kadr jáne instagram.com/sultankyzy paraqshasynan