Omıkron shtammynyń Qazaqstanǵa jetýi ýaqyt enshisinde – Aıjan Esmaǵambetova

NUR-SULTAN. QazAqparat – Omıkron shtammy Qazaqstan aýmaǵyna erteli-kesh jetedi. Bul týraly QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova aıtty, dep habarlaıdy QazAqparat tilshisi.

«Búginde Omıkron álemniń 60-qa jýyq elinde tirkelgen. Munyń ózi 1 aıdyń ishinde oryn aldy. Bul degenińiz, Omıkronnyń óte jyldam taraıtyndyǵyn bildiredi. Ózge shtammdardy mysalǵa ala otyryp, Omıkronnyń Qazaqstanǵa tasymaldanýy tek ýaqyt enshisinde ekendigin aıtýǵa bolady. Bul shtammnyń elimizge tasymaldanýynyń aldyn alý úshin qabyldanyp jatqan is-sharalar arqyly sol ýaqytty uzaqqa sozýǵa tyrysyp jatyrmyz», - dedi komıtet tóraǵasy «BaigeNews» Youtube arnasynda ótken suhbat barysynda.

Onyń atap ótýinshe, qazirgi ýaqytta koronavırýstyń jańa shtammy - Omıkronǵa qatysty ǵylymı negizde dáleldengen senimdi málimetter joq.

«Oǵan klınıkalyq, epıdemıologııalyq málimetter, ony emdeýdiń ári aldyn alýdyń túrli ádisteriniń tıimdiligi týraly aqparattar jatady. Al biz úshin bul ýaqyt shtammnyń ózgeriske ushyraǵanyna ne ushyramaǵandyǵyna qatysty málimetterdiń paıda bolýy úshin qajet. Ol keı naýqasta aýyr nemese jeńil ótedi. Keıde óte qaýipti, tipti aýyr jaǵdaılarǵa dýshar qylyp, ólim-jitimge de alyp keledi», - dedi Aıjan Esmaǵambetova.