Omıkron ımmýndyq júıeniń jasýshalaryna da áser etedi - dáriger

ALMATY. QazAqparat - Qazir aınalymda júrgen koronavırýstyń omıkron nusqasy burynǵy shtamdarǵa qaraǵanda 3-5 ese juqpaly. Bul týraly onlaın brıfıng barysynda S. Asfendııarov atyndaǵy Qazaq ulttyq medıtsına ýnıversıtetiniń juqpaly jáne tropıkalyq aýrýlar kafedrasynyń professory Kúlásh Qurmanova aıtty, dep habarlaıdy QazAqparat tilshisi.

Medıtsına ǵylymdarynyń doktory omıkronnyń taralýy popýlıatsııada «ujymdyq ımmýnıtettiń» tezirek qalyptasýyna yqpal etedi jáne koronavırýstyń basqa aınalymdaǵy shtamdaryn yǵystyrady dep sanaıdy.

Sonymen qatar, ol delta shtamymen aýyrǵandardyń nege omıkron juqtyratynyn túsindirdi.

«Delta shtamynan aýyr zardap shekken patsıentterdiń bir bóligi vırýsqa qarsy qorǵanys antıdenesin shyǵarýǵa jaýap beretin jasýshalyq ımmýnıtetti kúrt tómendetedi, sondyqtan olar koronavırýstyń basqa shtamdarymen salystyrǵanda juqpaly omıkronmen qaıta aýyrýy múmkin», - deıdi professor.

Kúlásh Qurmanova koronavırýs sımptomdary bar Almaty turǵyndarynyń PTR-testileýden ótýi, aınalasyndaǵylarǵa juqtyrmaýy úshin ýaqytynda oqshaýlanýy óte mańyzdy ekenin tilge tıek etti.

«Eger adam koronavırýs ınfektsııasyn jeńil túrde juqtyrsa, onda ol detoksıkatsııa úshin kóp suıyqtyq ishýi kerek. Vırýstyq ınfektsııa úshin antıbıotık ishý durys emes. Olardy dáriger bakterııalyq ınfektsııa qosylǵan kezde ǵana taǵaıyndaıdy», - dedi spıker.

Onyń aıtýynsha, omıkron tynys alý joldary ǵana emes, sonymen qatar ımmýndyq júıeniń jasýshalaryna da áser etedi.

Bul Covid-Long dep atalatyn kópjúıeli qabyný reaktsııasyn týdyrady, sonymen qatar jasyryn ınfektsııalar kúshine enedi.

Sondyqtan aǵzany qorǵaý úshin vaktsınatsııa óte mańyzdy.