Ombyda «Qazaq handyǵy. Almas qylysh» fılmi kórsetiledi

NUR-SULTAN. QazAqparat – Erteń Omby qalasynyń turǵyndaryna Reseıdegi Qazaqstan kınosy festıvali aıasynda «Qazaq handyǵy. Almas qylysh» fılmi usynylady, dep habarlaıdy QazAqparat «Qazaqfılm» AQ baspasóz qyzmetine silteme jasap.

«2020 jyldyń 21 qańtar kúni Omby qalasynyń «Vavılon» kıno ortalyǵynda Reseıdegi Qazaqstan kınosy festıvali aıasynda QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirgen «Qazaq handyǵy. Almas qylysh» fılmi kórsetiledi. Kınotýyndynyń kórsetilimine Omby qalasyndaǵy QR Bas konsýly jáne basqa da qurmetti qonaqtar shaqyrylǵan» delingen aqparatta.

Tarıhı fılm kórermenge qazaq tilinde (tıtr - orys tilinde) kórsetiledi.

Aıta ketsek, atalǵan týyndyń rejısseri – Qazaqstannyń eńbek sińirgen qaıratkeri, kınorejısser, stsenarıst ári sýretshi Rústem Ábdirashev.

Bul aýqymdy tarıhı fılm - Іlııas Esenberlınniń «Almas qylysh» romanynyń negizinde jazylǵan «Qazaq handyǵy» kınodıologııasynyń birinshi bólimi.

Fılmde XV ǵasyrda Qazaq handyǵynyń qurylýy jáne Jánibek pen Kereı sultandardyń tarıhı róli týraly baıandalady.

«Qazaq handyǵy» jobasynyń ıdeıa avtory - QR Tuńǵysh Prezıdenti – Elbasy Nursultan Nazarbaev.