«Omby-Maıqapshaǵaı» avtojoly merziminen buryn jóndeldi

PAVLODAR. QazAqparat - Pavlodar oblysynda «Omby-Maıqapshaǵaı» avtojolynyń ortasha jóndeý jumystary merziminen buryn aıaqtaldy, dep habarlaıdy QazAqparat QR Indýstrııa jáne ınfraqurylymdyq damý mınıstrligine silteme jasap.

Mınıstrliktiń málimetinshe, búgin 14 mamyrda «RF shekarasy (Omby) - Maıqapshaǵaı» avtojoly ýchaskesinde jańartý jumystary merziminen buryn aıaqtalǵan.

«Pavlodar-Tereńkól-Jelezınka-Omby baǵyty boıynsha, 208-227, 293-299, 307-309 shaqyrymdarynda jańa asfalt jabyndy salyndy. Bas merdiger «PKF Gordorstroı» JShS. Jolshylar jalpy uzyndyǵy 27 km jańa asfalt tóseýdi jáne frezerleý ádisimen ortasha jóndeý jumystaryn júrgizdi. Qurylys ýchaskesine 60 jol jóndeý tehnıkasy men 80 adam jumyldyrylǵan bolatyn», delingen habarlamada.

Aıta keterligi,.2019 jyly «QazAvtoJol» UK» AQ-nyń Pavlodar oblystyq fılıaly jalpy uzaqtyǵy 146 km respýblıkalyq mańyzy bar 8 avtojol ýchaskesinde ortasha jóndeý jumystaryn júrgizýdi josparlap otyr.