Ombýdsmen Parlamenttiń kez kelgen otyrysyna kedergisiz qatysa alady
Zań jobasynyń maqsaty - Adam quqyqtary jónindegi ýákildiń konstıtýtsııalyq mártebesin bekitý bóliginde QR Konstıtýtsııasyna engizilgen ózgeristerdi iske asyrý.
«Konstıtýtsııanyń jańa 83-1-babynyń normasymen Ýákil qyzmetiniń mindetteri, táýelsizdigi men ókilettikterin júzege asyrý kezinde qandaı da bir memlekettik organdar men laýazymdy adamdardyń aldynda esep bermeýiniń kepildikteri bekitildi. Budan bylaı Adam quqyqtary jónindegi ýákildiń quqyqtyq jaǵdaıy men onyń qyzmetin uıymdastyrýdy konstıtýtsııalyq zań aıqyndaıdy. Ýákil týraly qoldanystaǵy Zań byltyr 29 jeltoqsanda qabyldanǵanyn atap ótken jón. Zańda ýákildiń qyzmeti týraly negizgi erejeler bekitildi. Osyǵan baılanysty Parlament Májilisine engizilgen Ýákil týraly Konstıtýtsııalyq zań jobasy qoldanystaǵy erejeler negizinde, naqty tolyqtyrýlarmen jáne zańnyń qurylymyn qaıta qaraý negizinde ázirlendi», - dedi Ádilet vıtse-mınıstri Alma Muqanova.
Jalpy, Konstıtýtsııalyq zań jobasy 6 taraýdan jáne 23 baptan turady.
«Qoldanystaǵy zańda kózdelmegen negizgi jańa erejelerge tolyǵyraq toqtalǵym keledi. Jańa erejelerdi eki topqa bólýge bolady, birinshisi – ýákildiń quzyrettiligin kúsheıtý, ekinshisi – onyń qyzmetin uıymdastyrýdyń tıimdiligin arttyrý. Ýákildiń quzyretin kúsheıtý bóliginde Ýákilge QR Parlamenti Palatalarynyń kez kelgen, ashyq ári jabyq, birlesken jáne bólek otyrystaryna qatysýǵa, sondaı-aq sóz sóıleýge quqyq berý usynylady. Ekinshiden, zań jobasynda adamnyń Konstıtýtsııada bekitilgen quqyǵy men bostandyǵyn qozǵaıtyn normatıvtik quqyqtyq aktilerdiń Konstıtýtsııaǵa sáıkestigi máselesi boıynsha Ýákildiń Konstıtýtsııalyq Sotqa júginý quqyǵy kózdelgen», - dedi vıtse-mınıstr.
Onyń sózine qaraǵanda, Ýákilge shaqyrtý boıynsha basqa memleketterde adam quqyǵynyń saqtalýyna baıqaýshy retinde áreket etý quqyǵyn berý usynylyp otyr.
«Ýákildiń quzyretin kúsheıtý maqsatynda onyń arnaýly áleýmettik qyzmetter kórsetetin uıymdarǵa jáne qylmystyq-atqarý júıesi mekemelerine kedergisiz barýy quqyǵy bekitiledi», - dep naqtalady vedomstvo ókili.