Omannyń «NurMýskat» arnasy Nursultan Nazarbaev týraly fılmdi kórsetti

ASTANA. QazAqparat - Tunǵysh Prezıdent kúni men Qazaqstan Respýblıkasy Táýelsizdiginiń 25 jyldyǵy qarsańynda Oman Sultandyǵynyń «NoorMuscat» telearnasy «Balalyq shaǵymnyń aspany» atty kórkem fılmi kórsetti, dep xabarlaıdy QazAqparat tilshisi QR Syrtqy ister mınıstrliginiń baspasóz qyzmetine silteme jasap.

"Kınotýyndyny kórseterdiń aldynda Qazaqstannyń Omandaǵy Elshisi Erjan Muqash omandyq telearnanyń tilshilerine suhbat berip, QR Tuńǵysh Prezıdenti Nursultan Nazarbaevtyń basshylyǵymen elimizdiń Táýelsizdik jyldarynda qol jetkizgen jetistikteri, sondaı-aq Qazaqstan-Oman qarym-qatynastarynyń jaı-kúıi men bolashaǵy jaıynda áńgimelep berdi", - delingen resmı xabarlamada.

Aıta keteıik, «Balalyq shaǵymnyń aspany» - 2011 jylǵy rejısser Rústem Ábdirashevtyń Qazaqstannyń tuńǵysh Prezıdenti Nursultan Nazarbaevtyń balalyq jáne jastyq shaǵy jaıynda túsirgen kórkem fılmi. Kópserııaly «Kóshbasshy joly» kınoepopeıasynyń birinshi bólimi. 2011 jyly 7 sáýirde Nursultan Nazarbaev Astana qalasynyń «Qazaqstan» ortalyq kontsert zalynda bolyp, fılmniń tusaýkeserine qatysqan bolatyn.