Oman Qazaqstannan et ónimderin satyp almaq

NUR-SULTAN. QazAqparat – Qazaqstannyń Omandaǵy Elshisi Najmedın Muhametáli Maskat qalasynda sol eldiń Aýyl sharýashylyǵy jáne balyq resýrstary mınıstri Hamad ál Aýfımen kezdesti, dep habarlaıdy QazAqparat tilshisi.

QR Syrtqy ister mınıstrliginiń málimetinshe, taraptar aýyl sharýashylyǵy salasyndaǵy yntymaqtastyqty damytý máselelerin talqylady.

Kezdesý barysynda Qazaqstan men Omannyń agroónerkásiptik kásiporyndary arasyndaǵy seriktestiktiń jandanyp kele jatqandyǵy aıtyldy. Oman tarapy dándi daqyldar men et ónimderin satyp alýǵa, sondaı-aq teńiz ónimderiniń eksportyn arttyrýǵa múddeli. Ekijaqty yntymaqtastyqty jandandyrý úshin Oman tarapy eki eldiń aýyl sharýashylyǵy mekemeleri basshylarynyń saparlaryn uıymdastyrýdy usyndy.

Sonymen qatar eki eldiń aýyl sharýashylyǵy ónimderin jetkizý maqsatynda logıstıkamen qamtamasyz etý máseleleri boıynsha syndarly pikir almasý ótti. Atap aıtqanda, Qazaqstan - Túrikmenstan - Iran temirjol jelisiniń, sondaı-aq Iran, Qazaqstan, Oman, Túrikmenstan jáne Ózbekstan múshe Halyqaralyq tranzıttik kólik dáliziniń (Ashhabad kelisimi) áleýeti atap ótildi. Taraptar kólik baılanystaryn damytý boıynsha birlesken is-áreketti jandandyrý qajettigine nazar aýdardy.