Oljas Súleımenov TMD-nyń «Dostastyq juldyzdary» syılyǵynyń laýreaty atandy

NUR-SULTAN. QazAqparat – Seısenbi kúni Máskeýde ótken rásimde «Dostastyq juldyzdary» memleketaralyq syılyqtary TMD-nyń toǵyz eliniń laýreatyna tabystaldy, dep habarlaıdy QazAqparat reseılik TASS aqparat agenttigine silteme jasap.

«Dostastyq juldyzdary» - TMD-nyń gýmanıtarlyq saladaǵy joǵary jetistikteri úshin beriletin marapat. Onyń ıegerleriniń arasynda MMHQI rektory, Reseı Ǵylym akademııasynyń akademıgi Anatolıı Torkýnov, Reseı-armıan ýnıversıtetiniń rektory Armen Darbınıan (Armenııa), fızık ǵalymdardyń avtorlyq ujymy: Aleksandr Týzıkov, Sergeı Zolotoı jáne Sergeı Korenıako (Belarýs), Astrofızıka ınstıtýtynyń dırektory Gúlchehra Kohırova (Tájikstan), ulttyq ǵylym akademııalarynyń prezıdentteri Murat Jumataev (Qyrǵyzstan) jáne Ion Tıgınıaný (Moldavııa) bar. Sondaı-aq, syılyq ıegerleriniń arasynda Qazaqstan jazýshysy Oljas Súleımenov, Ázerbaıjannyń opera ánshisi Elchın Ázızov jáne Ózbekstannyń estrada-sımfonııalyq orkestriniń jetekshisi Mansur Tashmatov bar.

Saltanatty rásimde sondaı-aq ózderin gýmanıtarlyq salada tanytqan jastarǵa arnalǵan «Debıýtter dostastyǵy» syılyǵy da berildi. Atalǵan syılyq TMD-da Ekinshi Dúnıejúzilik sońystaǵy Jeńistiń 75-jyldyǵy bolyp jarııalanǵan 2020 jyldyń qorytyndylary boıynsha tabystaldy. Syılyq ıegerleriniń arasynda «Joǵary ekonomıka mektebi» ulttyq zertteý ýnıversıtetiniń qyzmetkeri, Smolensk memlekettik ýnıversıteti kafedrasynyń oqytýshysy Anton Azarenkov, oqytýshylar Zaýr Mámedov (Ázerbaıjan), Armen Aıvazıan (Armenııa), tilshi Ekaterına Myslıvets (Belarýs), sýretshi Almas Nurǵojaev (Qazaqstan), A.Maldybaev atyndaǵy Ulttyq akademııalyq opera jáne balet teatrynyń solısti Farýh Sadyrqulov (Qyrǵyzstan), «Orys tarıhı-patrıottyq klýby» qoǵamdyq uıymynyń jetekshisi Alekseı Petrovıch (Moldavııa), Tájikstan Ulttyq murajaıy ekskýrsııalyq bólimi bastyǵynyń orynbasary Mýmınpýr Mýbırhonı, Ózbekstan Qarýly kúshteri murajaıynyń jetekshi ǵylymı qyzmetkeri Barno Isahova bar.

Shara aralas formatta ótti, rásimge RF prezıdentiniń arnaıy ókili Shvydkoı, Ázerbaıjan Elshisi Bıýlbıýl oǵly jáne Gýmanıtarlyq yntymaqtastyq memleketaralyq qorynyń atqarýshy dırektory Anatolıı Iksanov qatysty, al laýreattar beınebaılanysqa shyqqan.

Syılyqtardyń tabystalý rásimine TMD Jastar sımfonııalyq orkestri arnaıy kontserttik baǵdarlamasyn usyndy. Syılyq laýrettaryna arnaıy dıplom, qurmet belgisi men kýálik tabystalady. Syılyqtyń aqshalaı balamasy 2 mln Reseı rýblin quraıdy.