Oljas Súleımenov OQO jastary men zııaly qaýym ókilderimen kezdespek

ShYMKENT. QazAqparat - Ońtústik Qazaqstan oblysynyń ákimi Janseıit Túımebaev aqyn, qoǵam qaıratkeri  Oljas Súleımenov  jáne Qazaq Ulttyq agrarlyq ýnıversıtetiniń rektory, akademık Tilektes Espolovpen kezdesti,  dep habarlaıdy QazAqparat HAA tilshisi.

Kezdesý barysynda oblys ákimi aımaqtyń ekonomıkalyq jaǵdaıyn, mádenıet, rýhanııat salasyndaǵy atqarylǵan jumystardy sóz etti.

«Sizdiń elimizdiń rýhanııat salasyna sińirgen eseli eńbegińiz ben  shyǵarmashylyǵyńyz  bolashaq zııaly qaýym men búgingi jastarǵa úlken ónege. Elbasy sizdiń eren eńbegińizdi erekshe baǵalap, 80 jyldyq mereıtoıyńyzda «Qazaqstannyń Eńbek Eri» altyn juldyzymen  marapattaǵanyn bilemiz. Bul sizge kórsetilgen laıyqty qurmet pen baǵa dep bilemin. Siz qazaq zııalylarynyń kóshin bastap otyrǵan tulǵalarymyzdyń birisiz. Sondyqtan sizdiń Ońtústikke at basyn burýyńyzǵa erekshe qýanyshtymyn», - dedi Janseıit Qanseıituly.

Óz kezeginde aqyn Oljas Súleımenov oblys ákiminiń ystyq iltıpatyna alǵys bildirdi. Sondaı-aq elimizdegi mádenıetke qoldaý bildirip, ádebıetti damytý, tatýlyq pen azamattyq kelisimdi nyǵaıtý maqsatynda qoǵamdyq jumystardyń mańyzdy ról atqaratyndyǵyn tilge tıek etti. 

«Ońtústik men úshin orny erekshe ólke. Mundaǵy halyqtyń ystyq yqylasy jan jadyratady. Jeri shuraıly, eli shyraıly ólkeniń damý qarqyny báseńdemeı, órkendeı túsetinine kámil senimdimin. Jumystaryńyzǵa tabys, eńbekterińizge jemis tileımin», - dedi aqyn.

Oljas Súleımenov ońtústikke jasaǵan sapary barasynda oblys jastarymen júzdesip, ǵalymdar men zııaly qaýym ókilderimen kezdesýdi josparlap otyr.