Oljas Súleımenov: Abaı – qazaq halqynyń ustazy

ALMATY. QazAqparat - Qazaqstannyń halyq jazýshysy, aqyn, ádebıettanýshy, memleket jáne qoǵam qaıratkerit Oljas Súleımenov Abaıdyń ulylyǵy týraly aıtty, dep habarlaıdy QazAqparat tilshisi.

«Abaı – qazaq halqynyń ustazy. Óıtkeni, ol óziniń zamandastaryna qaraǵanda kóp nárseni túsinip, aldaǵyny boljaı bildi. Abaı dúnıege óz kózimen qarap, kórgeni men sezgenin jaltaqtamaı aıtqan. Aqynnyń shyǵarmalary búgin de ózektiligin joǵaltqan joq. Abaıdyń qara sózderindegi oı-tujyrymdary barshamyzǵa qashanda rýhanı azyq bola alady. Alaıda, biz onyń aıtqandaryn áli de tolyq oryndamaı kelemiz. Búginde biz onyń «basqa halyqtarmen dos bolyp, olardy qurmeteseń, sizdiń halqyńyzǵa qurmet kórsetiledi» degen oıyn júzege asyrdyq», - deıdi O.Súleımenov.

Sondaı-aq ol Abaıdyń eginshilikpen aınalysý ósıeti týraly aıtyp ótti.

«Alaıda, oǵan qulaq aspadyq, kóshpendilik dástúrden bas tartpadyq. Sonyń saldarynan 30-jyldary qazaq jeri halqynyń 2/3 bóligi nemese 3/4 bóliginen aıyryldy. Eger olar HH ǵasyrdyń basynan bastap eginshilikpen aınalyssa, ólimnen qutylar edi. Qanshama uly adamdar ketti. Olardyń qatarynda bolashaq ǵalymdar, uly sýretshiler bar bolatyn. Olar ustazy - Abaıǵa baǵynbady. Bolashaq urpaq osyndaı qatelikterge boı aldyrmaý úshin biz búgin jınalyp otyrmyz»,– dedi qoǵam qaıratkeri.

Eske salaıyq, Qazaqstan Úkimetiniń qaýlysymen 10 tamyz Abaı kúni bolyp belgilendi.

Búgin elimizdiń zııaly qaýym ókilderi Almaty jáne Nur-Sultan qalalaryndaǵy Abaı eskertkishterine gúl shoqtaryn qoıdy.