Oljas Qudaıbergen EAEO qyzmetiniń negizgi baǵyttary týraly aıtyp berdi
«Bizde áýelden keden odaǵy boldy. Taýar tasymaly erkin edi. EAEO degenimiz – taýar, kapıtal men jumys kúshiniń erkin qozǵalysy. Taýar tasymaly boıynsha atqarylar jumys kóp: retteýshi bóligin ózgertý kerek, ol áli istelip jatyr. Jumys kúshin almasý bar. Qyzmetterge keler bolsaq, aıaqtalmaǵan jumys qyrýar, biraq másele onda emes. Taýarlardyń bir bóligi Reseı arqyly ótkende tarıfterge, ruqsat berý júıesine qatysty máseleler týyndaıdy. Ýaqytynda qabyldanbaǵan sheshimder saldarynan bizdiń kompanııalarymyz zardap shegetin jaǵdaılar jıi bolady. Aıaqtalmaǵan jumys degende osyndaı daýlardy meńzeımiz. Al Eýroodaqta mundaı másele joq. Sol sebepti osyndaı daý týyndamaıtyndaı sheshim tabýymyz qajet», - dedi ekonomıst Oljas Qudaıbergen.
Spıker EAEO ekonomıkalyq ıntegratsııa úlgisinde qurylǵanyn tilge tıek etti.
«Kelissózder kezinde biryńǵaı parlament, ásker qurýǵa umtylys boldy. Árıne, kelissóz barysynda qatysýshy elderdiń bári bul bólikterdi alyp tastap, tek ekonomıkalyq ıntegratsııa formatyn qaldyrdy. Ádette ıntegratsııa qandaı da bir paıda úshin jasalady ǵoı, sol sebepti munda ekonomıkalyq ıntegratsııa turǵysynan paıda bar», - dep tolyqtyrdy ol.
Prezıdent Qasym-Jomart Toqaev aýylsharýashylyǵy salasyndaǵy ónim óndirýshilermen kezdesip, jaqynda Máskeýde ótken sammıtti qorytyndylap, EAEO qyzmetiniń negizgi baǵyttaryn aıqyndap bergenin aıta keteıik.