Oljas Bektenov jumys saparymen Bishkekke bardy
Bishkekte Qazaqstan Úkimetiniń basshysyn Qyrǵyzstan Prezıdenti Sadyr Japarov qabyldady. Oljas Bektenov Memleket basshysy Qasym-Jomart Toqaevtyń sálemin jetkizip, Qazaqstan Úkimeti ekijaqty saýda-ekonomıkalyq yntymaqtastyqty odan ári damytý úshin bar kúsh-jigerdi jumsaýǵa daıyn ekenin bildirdi.
Qyrǵyzstan Mınıstrler kabınetiniń tóraǵasy – Prezıdent Ákimshiliginiń basshysy Aqylbek Japarovpen úkimettik deńgeıdegi kelissóz barysynda Prezıdent Sadyr Japarovtyń Qazaqstanǵa aldaǵy resmı saparyna daıyndyq máselesi qaraldy.
Taraptar ózara taýar aınalymyn $2 mlrd-qa deıin ulǵaıtý jónindegi birlesken sharalardy talqylady. Onyń ishinde eki eldiń saýda-ekonomıkalyq yntymaqtastyǵyn nyǵaıtýǵa baǵyttalǵan naqty jobalarǵa nazar aýdaryldy.
Qazaqstan $260 mln somasyna 195 taýar pozıtsııasy boıynsha eksportty ulǵaıtýǵa daıyn. Azyq-túlik, ónerkásip, munaı-hımııa, qurylys, farmatsevtıka jáne basqa da salalardyń áleýeti zor. Sondaı-aq buǵan shekara mańynda Indýstrııalyq saýda-logıstıkalyq keshen qurý týraly josparlar da yqpal etedi. Atalǵan jobanyń iske qosylýy mýltıplıkatıvti áserge ıe bolyp, saýda-ekonomıkalyq jáne ınvestıtsııalyq baılanystarǵa qosymsha serpin beredi.
Aýyl sharýashylyǵyndaǵy yntymaqtastyqtyń áleýetin tolyqqandy ashý úshin eki eldiń úkimetteri ónimderdiń ózara tasymalyn ulǵaıtý jáne birlesken jobalardy iske qosý jóninde sharalar qabyldaıtyn bolady, sondaı-aq eki eldiń ǵylymı-zertteý ınstıtýttary men agrarlyq joǵary oqý oryndary arasyndaǵy belsendi ózara is-qımyl jalǵasady.
Oljas Bektenov 2024 jylǵy vegetatsııalyq kezeńde memleketaralyq paıdalanýdaǵy sý sharýashylyǵy obektileriniń jumys rejımderin bekitýdiń mańyzyn atap ótti.
Sonymen qatar taraptar qazaq-qyrǵyz shekarasynyń ótkizý qabiletin jáne júk tasymaldaýshylar úshin tranzıtti tartymdy etý baǵytynda atqarylyp jatqan jumys qarqynyn atap ótti. Qazaqstannyń tranzıttik kólik áleýetin damytýdyń 2030 jylǵa deıingi tujyrymdamasyna sáıkes «Qarasý», «Besaǵash», «Aýhatty», «Sartóbe» «Aısha bıbi», «Sypataı batyr», «Kegen» ótkizý beketterin salý jáne rekonstrýktsııalaý kózdelip otyr.
Kezdesý barysynda taraptar bilim, mádenıet jáne týrızm salalaryndaǵy ózara is-qımyl máselelerin de talqylady.
Kelissóz qorytyndysy boıynsha eki eldiń memleket basshylary qoıǵan mindetterdiń barlyǵyn tolyq kólemde iske asyrýǵa jáne qazaq-qyrǵyz yntymaqtastyǵyn jańa deńgeıge kóterýge daıyndyq máselesi naqtylandy.