Oljas Bektenov «jasyl ekonomıka» ındıkatorlaryn óńirlik damý josparlaryna biriktirýdi tapsyrdy

<p>ASTANA. KAZINFORM &ndash; Úkimette Premer-Mınıstr Oljas Bektenovtiń tóraǵalyǵymen ótken &laquo;Jasyl&raquo; ekonomıkaǵa kóshý jónindegi keńes otyrysynda Memleket basshysynyń 2060 jylǵa qaraı kómirtegi beıtaraptyǵyna qol jetkizý jáne energııa syıymdylyǵyn tómendetý jónindegi Qazaqstan halqyna Joldaýynda qoıǵan maqsattaryn iske asyrý máseleleri qaraldy. Qoıylǵan mindetterdi oryndaý jumystarynyń barysy týraly &laquo;Halyqaralyq jasyl tehnologııalar jáne ınvestıtsııalyq jobalar ortalyǵy&raquo; (HJTIJO) KEAQ basqarma tóraǵasy Dıdar Qarymsaqov baıandady, sondaı-aq birqatar óńir ákimderiniń baıandamalary tyńdaldy.</p>

«Jasyl» ekonomıkaǵa kóshý tujyrymdamasy Qazaqstanda 10 jyldan astam ýaqyt boıy júzege asyrylyp keledi. Osy kezeńde elimizde jańartylatyn energııa kózderiniń úlesi 4,5%-ǵa deıin jetkizildi. Óndiris qaldyqtaryn qaıta óńdeý deńgeıi 25%-ǵa, tutyný deńgeıi 39%-ǵa jetti. Tujyrymdamada belgilengen maqsattardy iske asyrýdyń eń tıimdi quraldarynyń biri — ónerkásiptik jáne aýyl sharýashylyǵy kásiporyndarynyń qoljetimdi eń ozyq tehnıkalardy qoldanýy. 2021-2023 jyldar kezeńinde HJTIJO TOP-50 qatarynan iri kásiporyndardyń qyzmetin qamtıtyn óndiristik protsesterde tıimdi tehnologııalardy paıdalaný boıynsha ónerkásiptiń ártúrli salasy úshin 16 anyqtamalyqty jasaqtady. 2027 jylǵa deıin óńdeý salasy, sýmen jabdyqtaý, qaldyqtardy ýtılızatsııalaý jáne mal sharýashylyǵy kompanııalary úshin taǵy 16 qujat ázirleý josparda bar.

«Álemdik tájirıbe kórsetkendeı, kóptegen damyǵan elderde bıznestiń ózi salalyq anyqtamalyqtardy ázirleýge qarajat salýǵa múddeli. Osyǵan baılanysty Ekologııa jáne tabıǵı resýrstar mınıstrligi "Atameken" palatasymen, múddeli salalyq qaýymdastyqtarmen jáne uıymdarmen birge 2025–2027 jyldarǵa josparlanǵan anyqtamalyqtardy ázirleý jónindegi is-sharalardy birlesip qarjylandyrý máselesin pysyqtaýy qajet», — dep atap ótti Oljas Bektenov.

Otyrys barysynda «jasyl» ekonomıkaǵa kóshý sheńberinde teńgerimdi aýmaqtyq damýǵa kóp kóńil bólinetini aıtyldy. Máselen, Soltústik Qazaqstan oblysy jańartylatyn energııany paıdalaný boıynsha oń nátıje kórsetip otyr. Óńirde jalpy qýaty 70,3 MVt bolatyn 174 energııa kózi jumys isteıdi. Bul rette ósimdikten alynatyn otyn esebinen bıomassamen jumys isteıtin 125 qazandyq ornatylyp, 80 bıýdjettik mekeme energııamen qamtamasyz etildi. Bul shamamen 260 mln teńgeni únemdeýge múmkindik beredi. Aqmola oblysynda ótken jyldyń qorytyndysy boıynsha kásiporyndar qaldyqtarynyń kólemi 2021 jylmen salystyrǵanda 96%-ǵa tómendedi. Óńirdiń elektr energetıkasynyń jalpy kólemindegi «jasyl» energııanyń úlesi 74%-dy quraıdy. Jambyl oblysy sý resýrstaryn tıimdi paıdalaný qajettiligine baılanysty 2025 jylǵa deıin 257 sý nysanyn jóndeý josparlary týraly esep berdi. Qazirgi tańda óńirge sýarmaly sýdyń negizgi kólemi Talas jáne Shý transshekaralyq ózenderinen keledi.

Oljas Bektenov Memleket basshysynyń «Jasyl» ekonomıkaǵa kóshý jónindegi tujyrymdamany ózektendirý týraly jańa Jarlyǵynda aýanyń lastanýyn tómendetý, organıkalyq ónim óndirisin arttyrý, sý únemdeý tehnologııalaryn engizý boıynsha ózekti nysanaly kórsetkishter belgilengenin atap ótti. «Jasyl» ekonomıkaǵa kóshý jónindegi jumys barlyq deńgeıde jandandyrylýy tıis. Premer-Mınıstr ákimdikterge múddeli ortalyq memlekettik organdarmen birlesip, jospar jobasynda «jasyl» ekonomıka ındıkatorlaryna qol jetkizýge baǵyttalǵan is-sharalardy qarastyrýdy tapsyrdy. Aldaǵy ýaqytta tıisti nysanaly kórsetkishterdi óńirlik damý josparlaryna biriktirý qajet.

«Ekologııalyq jobalardy qarjylyq qamtamasyz etý úshin jasyl kredıtteý jáne jasyl oblıgatsııalar shyǵarý tetikterin damytý qajet», — dedi Premer-Mınıstr. Qoıylǵan mindetterdi iske asyrý úshin 2024-2030 jyldarǵa arnalǵan tıisti is-sharalar josparynyń jobasy ázirlenip jatyr.