Oljas Bektenov tótenshe jaǵdaıdaǵy óńirler turǵyndaryn áleýmettik qoldaý jóninde tapsyrma berdi

<p>ASTANA. KAZINFORM &ndash; Qazaqstan Premer-Mınıstri Oljas Bektenov sý tasqyny saldaryn joıý sharalary jóninde keńes ótkizdi. Premer-Mınıstrdiń orynbasary Tamara Dúısenova men tıisti mınıstrler tyńdaldy. Búginde 8 myńǵa jýyq adam óz úılerine oraldy.</p>

Úkimet basshysy vıtse-premer bastaǵan áleýmettik blok mınıstrlikterine tótenshe jaǵdaıǵa tap bolǵan turǵyndarǵa jan-jaqty qoldaý kórsetýdi tapsyrdy.

Ýaqytsha baspanamen qamtamasyz etý

«Sý tasqyny bastalǵannan beri 86 myń turǵyn qaýipsiz jerge kóshirildi. Qazirgi tańda ýaqytsha ornalastyrý pýnktterinde 8 472 adam turyp jatyr. Evakýatsııalaý – ýaqytsha shara. Úıleri turýǵa jaramsyz dep tanylǵan otbasylardyń barlyǵyn ýaqytsha baspanamen qamtý qajet», — dep atap ótti Oljas Bektenov.

Sonymen birge qonys aýdarǵanǵa deıin evakýatsııalaý pýnktteriniń jumysyn qoldaýǵa erekshe kóńil bólý tapsyryldy. Ákimdikter turǵyndardy sapaly azyq-túlikpen, tıisti sanıtarııalyq-gıgıenalyq quraldarmen, qoljetimdi medıtsınalyq qyzmettermen qamtamasyz etýi kerek.

Óz kezeginde, evakýatsııalaý pýnktterinen ýaqytsha turýǵa qonystandyrý protsesi ıkemdi bolýy kerek. Eger sý tasqyny bolyp ótken óńirlerde turǵyndar úılerinde qalýdy qalasa, ákimdikter tıisti kómek kórsetýi qajet. Sonymen birge, urlyq-qarlyqqa jol bermeý úshin qaraýsyz qalǵan úıler Іshki ister mınıstrliginiń baqylaýynda bolady.

Bilim berý

«Qazirgi ýaqytta elimizdiń on óńirinde TJ rejımi jarııalanǵan. 130-dan astam mektep qashyqtan oqytý formatyna kóshirildi, biraq evakýatsııa aımaqtaryndaǵy balalardyń oqý protsesi úzilip qaldy. Bilim mınıstrligine mektep oqýshylaryn aǵymdaǵy emtıhandar men synaqtardan bosatýdy tapsyramyn. Sonymen qatar olarǵa joǵaltqan ýaqyttarynyń ornyn toltyrýǵa ári qaraı da kómektesý qajet» — dep atap ótti Premer-Mınıstr.

Sonymen qatar sý tasqynynyń belsendi kezeńi aıaqtalǵannan keıin apatty aımaqtardaǵy muǵalimder men oqýshylardy tehnıkalyq quraldarmen qamtamasyz etý máselesin pysyqtaý tapsyryldy.

Densaýlyq saqtaý

«Biz TJ rejımindegi óńirlerdiń keıbir turǵyndary epıdemıologııalyq jaǵdaıǵa alańdaıtynyn, zardap shekken halyq arasynda juqpaly aýrýlardyń órshýinen qaýiptenetinin kórip otyrmyz. Densaýlyq saqtaý mınıstrligine máseleni erekshe baqylaýda ustap, turǵyndardy aqparattandyrýdy tapsyramyn. Óńirlerde sý tasqyny jaǵdaıy turaqtalǵannan keıin aýmaqtardy tazartý jáne dezınfektsııalyq is-sharalar júrgizý, sý qubyry júıeleri men qurylystaryn, ortalyqtandyrylmaǵan sýmen jabdyqtaý júıelerin tazartý jáne dezınfektsııalaý boıynsha keshendi sharalar júrgizý qajet. Ákimdikterge sý jetkizý jumystaryn uıymdastyrý boıynsha tapsyrmalar berildi», — dedi Úkimet basshysy.

Epızootııalyq jaǵdaı

Sý basqan aımaqtardaǵy epızootııalyq jaǵdaıdyń nasharlaýyna jol bermeý maqsatynda Aýyl sharýashylyǵy mınıstrligi men Respýblıkalyq epızootııaǵa qarsy jasaqqa oblys ákimdikterimen birlesip, janýarlardyń óleksesin jınaý men joıýdy jedel aıaqtaý tapsyryldy. Joıý sharalaryn júrgizý úshin tıisti jabdyqtar, qyzmetkerler jáne qajetti dezınfektsııalyq quraldar qarastyrylǵan.

Infraqurylymdy qalpyna keltirý

«Úılerdiń qurylysy boıynsha jeke turǵyn úıdiń úlgilik jobasy ázirlenýde. Sonymen qatar áleýmettik ınfraqurylym nysandaryn, atap aıtqanda mektepter men balabaqshalar, aýrýhanalar men emhanalardy jóndeýge basymdyq berý mańyzdy. Qurylys jumystarynyń sapasyn qatań baqylaýda ustaý kerek», — dedi Oljas Bektenov.

«Pármendi tetikti pysyqtap, ony barlyq óńirlerge jetkizýdi tapsyramyn. Ekiushty túsindirýler bolmaýy kerek. qoǵam ókilderin protseske tartýdyń arqasynda aqshaǵa baqylaý kúsheıtiletin bolady», — dep túıindedi Premer-Mınıstr.