Oljas Bektenov SQO-da salynyp jatqan turǵyn úı qurylysyn tekserdi
Úkimet basshysy Petropavl qalasyndaǵy Birlik yqsham aýdanynda jańadan boı kótergen úıdi aralap, jańa baspana kiltin alǵan otbasy múshelerimen áńgimelesti. Oljas Bektenov aýqymdy sý tasqynynyń saldaryn joıýda túsinistik tanytyp, kómekteskeni úshin turǵyndarǵa alǵysyn bildirdi. Qurylys qarqyny men paıdalanýǵa berilgen turǵyn úıdiń sapasy, sondaı-aq sý tasqynynan keıingi kezeńde turǵyndardy qoldaý máselesi talqylandy.
«Prezıdent Qasym-Jomart Toqaev sý tasqynynan zardap shekken azamattardyń barlyǵynyń baspanasyn qalpyna keltirý máselesin erekshe baqylaýda ustap otyr. Soltústik Qazaqstan oblysy qaladaǵy sý basqan yqsham aýdandardaǵy úılerdiń qurylysyn alǵashqylardyń biri bolyp aıaqtady. Bizdiń basty mindetimiz – zardap shekkenderdiń barlyǵyn sýyq túskenge deıin úılerine kóshirý», — dep atap ótken Oljas Bektenov ákimdikke irgeles aýmaqty abattandyrýdy tapsyrdy.Óńirde barlyǵy 700 úı men 90 oryndyq balabaqsha salynyp jatyr. Jaqynda ǵana otbasylarǵa qonystaný úshin 53 úıdiń kilti berildi. Maýsym aıynyń sońyna deıin taǵy 47 úı berý josparlansa, 600 úıdiń qurylysy bıylǵy tamyz aıynyń sońyna deıin aıaqtalady. Birlik yqsham aýdany qajetti ınjenerlik kommýnıkatsııalarmen qamtamasyz etilgen, topyraqty joldar salynyp, serýendeýge jáne demalýǵa arnalǵan aımaqtardy abattandyrý júrgizilip jatyr.
Salynyp jatqan qurastyrmaly-qalqandy úılerdiń sapasy men tehnologııasyna erekshe nazar aýdaryldy. Qazirgi tańda 100-den astam ýchaskede irgetas qalanyp, konstrýktsııalar qurastyryla bastady, sonymen qatar sýmen jabdyqtaý jumystary júrgizilip jatyr.
Sondaı-aq sapar barysynda Oljas Bektenov qalpyna keltirýge jatatyn úılerdi jóndeý jumystarymen tanysty. Soltústik Qazaqstan oblysy – sý tasqyny saldaryn joıýǵa mehanıkalandyrylǵan brıgadalar tartylǵan jalǵyz óńir. Máselen, tek Oıqala yqsham aýdanynda 1 133 úı sý basý aımaǵynda boldy, onyń 309-y jóndeýdi qajet etedi. Jumystardy 24 mehbrıgada kezeń-kezeńimen oryndap jatyr, Petropavl boıynsha barlyǵy 85 osyndaı qurama bar. Qazirgi tańda edenderdi aýystyrý, qabyrǵalardy sylaý, gıps qatyrmasyn tóseý jumystary júrgizilip jatyr.
Sonymen qatar Úkimet basshysy menshik ıeleri ótemaqy túrinde tólengen qarajatqa ózderi jóndeý jumystaryn júrgizetin jeke turǵyn úıge bardy. Oljas Bektenov Úkimettiń negizgi mindeti – barlyq evakýatsııalanǵan turǵyndardy óz úılerine qaıtarý ekenin atap ótti, búginde 64 myń adam óz úılerinde turyp jatyr.
Sý tasqyny saldaryn joıý jáne júrgizilip jatqan is-sharalardy taldaý sheńberinde Premer-Mınıstrge Petropavlda rezervtik sýmen jabdyqtaý kózin salý josparlary týraly baıandaldy. Jobalyq qýaty saǵatyna 100 myń m3 bolatyn tehnıkalyq qurylysty tabıǵı jáne tehnogendik sıpattaǵy TJ týyndaǵan jaǵdaıda halyqty taza aýyz sýmen qamtamasyz etý úshin jumysy toqtatylǵan sorǵy stansasynyń ornynda salý kózdelgen. Jobany iske asyrý kóktemde Petropavl turǵyndary tap bolǵan qıyndyqtardy boldyrmaýǵa múmkindik beredi.
Úkimet basshysy mundaı apatty jaǵdaıdyń qaıtalanýyna jol berilmeıtinin atap ótip, SQO ákimdigine Qarjy mınıstrligimen birlesip jobany iske asyrýǵa qarajat bólý máselesin pysyqtaýdy tapsyrdy.
Anyqtama: Qazaqstannyń zardap shekken óńirlerinde búginde 841 otbasy qıraǵan turǵyn úıleriniń ornyna jańa úıler men páterler aldy. 1825 jańa úı salynyp jatyr. 4521 otbasy turǵyn úıdi jóndeýge jáne qalpyna keltirýge ótemaqy aldy.