Oljas Bektenov Prezıdentke sý tasqynynyń saldarymen kúres jumystary boıynsha esep berdi

<p>ASTANA. KAZINFORM - Prezıdentke Premer-Mınıstr Oljas Bektenov sý tasqynynyń saldaryn joıý jáne zardap shekken azamattarǵa jan-jaqty kómek kórsetý jumystary Úkimettiń tikeleı qadaǵalaýymen júrgizilip jatqanyn baıandady.</p>

Bul týraly Aqordanyń baspasóz qyzmeti habarlady.

Úkimet basshysynyń málimeti boıynsha qazirgi kezde 61352 adam óz úılerine oralǵan. Evakýatsııalyq pýnktterdegi turǵyndarǵa (5452 adam) barlyq qajetti kómek kórsetilip jatyr.

20 mamyrdaǵy jaǵdaı boıynsha 26 myńnan astam otbasyna 100 AEK mólsherinde birrettik tólem berý úshin 10 mıllıard teńgeden asa qarjy bólindi (jalpy, 32 655 ótinish kelip túsken). Bul jumystar Aqtóbe, Batys Qazaqstan, Aqmola, Qaraǵandy, Pavlodar, Abaı, Ulytaý oblystarynda tolyqtaı aıaqtaldy. Al Soltústik Qazaqstan oblysynda birrettik qarjylaı kómekti 6090, Qostanaı oblysynda 4085, Atyraý oblysynda 3730 otbasy aldy.

Budan bólek, zardap shekken turǵyndardy baspanamen qamtamasyz etý jumystary júrgizilip jatyr.

Qazirgi tańda baspanalary qıraǵan 239 otbasy jańa úıler men páterlerge qonystandy. Atap aıtqanda, Qostanaı oblysynda 146, Aqmola oblysynda 57, Aqtóbe oblysynda 28, Qaraǵandy oblysynda 6, Pavlodar oblysynda 2 baspana turǵyndardyń ıgiligine berildi.

Sonymen qatar Úkimet basshysynyń deregine sáıkes óńirlerde 873 jańa úıdiń qurylysy júrgizilýde. Naqtyraq aıtqanda, Batys Qazaqstan oblysynda 357, Qostanaı oblysynda 88, Aqtóbe oblysynda 153, Atyraý oblysynda 70, Soltústik Qazaqstan oblysynda 200, Pavlodar oblysynda 5 turǵyn úı salynyp jatyr.

Qazirge deıin 891 otbasyǵa úılerin jóndeý jáne qalpyna keltirý shyǵyndary úshin jalpy somasy 1,9 mıllıard teńge kóleminde ótemaqy tólengen.

Jalpy, sý tasqynynan zardap shekken aımaqtarda 11137 turǵyn úı tekserilip, 7863 nysandy baǵalaý jumystary aıaqtaldy.

Baǵalaý isiniń aıaqtalýyna qaraı, zardap shekken turǵyndarǵa asa qajetti dúnıe-múlik satyp alý úshin 150 AEK-ke deıin qosymsha ótemaqy tólenip jatyr. Sondaı-aq ólgen maldyń óteýi úshin memleketten bólingen qarjylaı kómektiń kólemi 1,3 mıllıard teńgeden asty.

Memleket qoldaýynan bıznes te tys qalmaıdy. Tasqynnan zardap shekken kásipkerlerdiń shyǵynyn óteý mehanızmderi anyqtalyp, tıisti jumystar bastalyp ketti. Búlingen úı men múlikti jedel baǵalaý úshin qosymsha resýrstar tartyldy.