Oljas Bektenov pen Taıland Úkimetiniń ókili eki el yntymaqtastyǵynyń keleshegin talqylady
2023 jyly Qazaqstan men Taıland arasyndaǵy taýar aınalymy $367 mln-ǵa jetti. Taraptar Koroldikke jetkiziletin otandyq agroónerkásip kesheni taýarlarynyń túrlerin keńeıtý múmkindigin qarastyrdy. Atap aıtqanda, Qazaqstan et, kókónis pen jemis, dándi daqyldar, un ónimderin, ósimdik maılaryn jáne basqa da AÓK ónimderin eksporttaýǵa múddeli.
«Memleket basshysynyń tapsyrmasy boıynsha biz aýyl sharýashylyǵy ónimderin saqtaý jáne dıstrıbýtsııalaýdyń tıisti ınfraqurylymy bar ulttyq taýar ótkizý júıesin damytyp jatyrmyz. Bul bizdiń elimizde agro azyq-túlik habyn qalyptastyrý úshin qajetti jaǵdaılar jasaýǵa múmkindik beredi. Osy máselede Qazaqstan men Taıland arasyndaǵy yntymaqtastyqty tereńdetýdiń keleshegi zor ári bul eki jaqqa da tıimdi», — dep Oljas Bektenov, Qazaqstan men Taılandtyń tıisti ınvestıtsııalyq jobalardy iske asyrýdaǵy keń múmkindikterin atap ótti.
Óz kezeginde, Phamtým Vechaııachaı Taıland pen Qazaqstan arasyndaǵy saýda-ekonomıkalyq baılanystardy nyǵaıtýǵa senim bildirdi.
«Búgin tańerteń biz ekonomıkalyq ózara is-qımyl týraly kelisimge qol qoıdyq. Bul qujat ártúrli salalardaǵy, sonyń ishinde saýda, ekonomıka jáne ınvestıtsııalardaǵy yntymaqtastyqty keńeıtýge yqpal etedi dep sanaımyn», — dedi Phamtým Vechaııachaı.
Kezdesý barysynda Taıland Úkimetiniń Qazaqstan azamattaryna vızasyz rejım usynýymen qatar, týrızm salasyndaǵy qatynastardyń oń damý dınamıkasy atap ótildi. Phýkette Konsýldyq pýnktiniń ashylýy Taıland aýmaǵynda júrgen qazaqstandyqtarǵa qajetti qoldaý kórsetýge múmkindik beredi.
Sonymen qatar Transkaspıı baǵytyn damytý aıasynda Qazaqstannyń tranzıttik áleýetin paıdalaný múmkindigi talqylandy.
Kezdesý sońynda taraptar eki el arasyndaǵy ekonomıkalyq yntymaqtastyqty tereńdetýge nıet bildirdi.