Oljas Bektenov paralımpıada ulttyq quramasynyń múshelerine Memlekettik Týdy tabystady
Tórtkúl dúnıe kóz tikken Parıjdegi dodada Qazaqstan týyn paralımpıadadan Azııa oıyndarynyń júldegeri, (voleıboldy otyryp oınaýdan) Qazaqstannyń on dúrkin chempıony Berik Іzmaǵanbeotv pen para oq atýdan chempıon Sevda Alıeva alyp shyǵady.
Saltanatty jıyn barysynda Oljas Bektenov sportshylarǵa ystyq yqylasyn bildirip, sáttilik tiledi.
– Paralımpıada tek sport emes, bul adamnyń sheksiz qabiletteriniń dáleli. Sizderdiń erik-jigerlerińiz ben batyldyqtaryńyz tańdanýǵa turarlyq. Mıllıondaǵan adamdar sizderdiń janqııarlyqtaryńyz ben myzǵymas rýhtaryńyzdan shabyt alady, ómirdegi kedergilerdi jeńýdi úırenedi. Búgin sizderge tabystalatyn tý – birlik pen jeńistiń sımvoly. Memleket basshysy álemniń basty sport jarystarynda eldiń ar-namysyn qorǵaý-qurmetti mindet, zor abyroı men jaýapkershilik ekenin atap ótti. Sizder Qazaqstandy halyqaralyq arenada laıyqty tanystyryp, jeńis tuǵyrynan kórinetinderińizge senimdimiz, - dep atap ótti Premer-mınıstr.
Bıylǵy dodada ulttyq qurama para júrý, para paýerlıftıng, para jeńil atletıka, para kanoe, para thekvondo, otyryp voleıbol oınaý, para oq atý, para ústel tennısi jáne para dzıýdoda baq synaıdy. Sportshylar ózderine júktelgen jaýapkershilik pen mindettelgen mıssııany adal atqarýǵa sóz berdi.
– Búgingi kún men úshin óte mańyzdy. Osyndaı deńgeıdegi jarystarda elimizdiń Týyn kóterý – úlken jaýapkershilik. Ár sportshy Paralımpıada oıyndaryna qatysýdy armandaıdy. Qazaqstannyń namysyn laıyqty qorǵaý úshin bar kúshimizdi salamyz. Bizdiń júregimizde Otanǵa degen súıispenshilik pen jeńiske degen erekshe umtylys bar, - dedi Berik Іzmaǵanbetov.
Paralımpıada oıyndaryna baratyn sportshylar sany jyl sanap artyp keledi. Máselen, Tokıodaǵy tartysqa Qazaqstannan 26 sportshy qatysqan bolsa, bıyl bási bıik báıgege sporttyń 9 túrinen 44 sportshy 33 joldama jeńip alǵan. 1996 jyldan beri jazǵy Paralımpıada oıyndarynda da Qazaqstan quramasy 7 medal ıelengen.
Ermurat ZULQARNAI