Oljas Bektenov Ortalyq Azııa elderi men halyqaralyq qarjy uıymdaryn kúsh biriktirýge shaqyrdy

<p>ASTANA. KAZINFORM - Memleket basshysynyń tapsyrmasy boıynsha QR Premer-mınıstri Oljas Bektenov Qazaqstannyń tóraǵalyǵymen Astanada ótken Ortalyq Azııa óńirlik ekonomıkalyq yntymaqtastyq (OAÓEY) baǵdarlamasynyń 23-shi mınıstrlik konferentsııasyna qatysty. Maqsat &ndash; Ortalyq Azııa óńiriniń ıntegratsııalanǵan jáne ornyqty damýyn qalyptastyrýda Baǵdarlamaǵa qatysýshy elder men halyqaralyq qarjy ınstıtýttary arasyndaǵy ózara is-qımyldy keńeıtý.</p>

OAÓEY baǵdarlamasy – Azııa damý bankiniń bastamasy, jetekshi halyqaralyq qarjy uıymdarymen seriktestikte júzege asyrylady. Konferentsııaǵa Azııa damý bankiniń prezıdenti Masatsýgý Asakava, OAÓEY ınstıtýtynyń dırektory Kabır Djýrazoda, Eýropalyq komıssııanyń Taıaý Shyǵys, Azııa jáne Tynyq muhıty boıynsha dırektory Peterıs Ýstýbs, Halyqaralyq valıýta qorynyń, Dúnıejúzilik banktiń, Islam damý bankiniń jáne basqa da qarjy uıymdarynyń ókilderi, sondaı-aq Ońtústik Koreıa, Japonııa, Ózbekstan, Qyrǵyzstan, Ázerbaıjan, Grýzııa, Mońǵolııa, Pákistan, Tájikstan, Túrikmenstan úkimettik delegatsııalary qatysty.

Memleketterdiń ekonomıkalyq jáne qarjylyq turaqtylyq, ınfraqurylymdy damytý, saýda, energetıka, sý resýrstary, dekarbonızatsııa jáne basqa da salalardaǵy ózara is-qımyly talqylandy.

Premer-mınıstr Oljas Bektenov Baǵdarlamanyń Ortalyq Azııa óńiri úshin ózektiligin atap ótti. 20 jyldan astam ýaqyt ishinde óńirge shamamen $51 mlrd ınvestıtsııa salynsa, onyń $9 mlrd-tan astamy Qazaqstandaǵy jobalarǵa baǵyttalǵan.

«Biz ortaq maqsattarǵa jetý úshin halyqaralyq qarjy uıymdarymen jáne OAÓEY-ǵa qatysýshy eldermen tyǵyz yntymaqtastyqta jumys isteýdi jalǵastyramyz. Biz tereń óńdeýge jáne qaıta óńdelgen ónim úlesin arttyrýǵa, eksport qurylymyn belsendi túrde ózgertýge jáne onyń kólemin ulǵaıtýǵa basa nazar aýdara otyryp, AÓK-ti damytýǵa baǵyttalǵanbyz. Sondaı-aq biz Ortalyq Azııa memleketteriniń kólik qatynasy men energetıkalyq turaqtylyǵyn qamtamasyz etetin aýqymdy ınfraqurylymdyq jobalardy iske asyrýǵa múddelimiz. Óńir elderi men halyqaralyq qarjy uıymdaryn birlesken jobalardy júzege asyrý úshin kúsh biriktirýge shaqyramyn», — dep atap ótti Oljas Bektenov.

Óz kezeginde Azııa damý bankiniń prezıdenti Masatsýgý Asakava OAÓEY basym baǵyttary qatarynda klımattyń ózgerýine qarsy kúreste sheshýshi is-qımyldar qabyldaý, erte eskertý júıelerimen turaqty ınfraqurylym qurý, sondaı-aq tsıfrlyq transformatsııany damytý jáne ınnovatsııalar engizý turǵanyn basa aıtty.

Konferentsııaǵa qatysýshylar adamı kapıtaldy damytýǵa jáne halyqtyń turmys sapasyn jaqsartýǵa baǵyttalǵan bastamalarǵa nazar aýdaryldy.

Qorytyndysy boıynsha OAÓEY Klımat jáne ornyqty damý jobalaryn daıyndaý qory týraly kelisimge qol qoıyldy.