Oljas Bektenov Mal jáne ósimdik sharýashylyǵyndaǵy derekterdi burmalaý faktilerin joıýdy tapsyrdy
«Aýyl sharýashylyǵynda dıhandardy qarjylandyrý júıesin qaıta qaraý tapsyryldy. Aýyl sharýashylyǵy mınıstrligine qarjy-ekonomıkalyq blokpen jáne Báıterek holdıngimen birge tikeleı sýbsıdııa berýden tómendetilgen stavkalar boıynsha qoljetimdi nesıe berýge birtindep kóshý mehanızmin ázirleýdi tapsyramyn. Bul jumysqa ekinshi deńgeıdegi bankterdi tartý qajet. Mal sharýashylyǵy men ósimdik sharýashylyǵyndaǵy derekterdi burmalaý faktilerine qatysty salany tsıfrlandyrý jumysyn kúsheıtý jáne derekterdi kez kelgen burmalap berýdiń jolyn kesý qajet. Sondaı-aq Bas prokýratýramen birge jerdi alýdyń ońaılatylǵan tártibin ázirlep, qabyldasyn», - dedi Oljas Bektenov.
Sonymen qatar ol Memleket basshysy elimizdiń orman alqaptaryn ulǵaıtýdy, onyń ishinde «Semeı ormany» rezervatynyń tuqymdyq materıal ósirýdegi tájirıbesin paıdalanýdy tapsyrǵanyn atap ótti.
«Ekologııa mınıstrligi osy jobany ormandy óńirlerdiń bárine taratýy kerek. Ekologııalyq mádenıetti damytýdyń 2029 jylǵa deıingi tujyrymdamasy qorshaǵan ortany taza kúıinde saqtaýdyń jáne «Taza Qazaqstan» ekologııalyq naýqanynyń jalǵasyna aınalýǵa tıis. Bul Tujyrymdamany osy aıdyń sońyna deıin qabyldaý qajet», - dedi Premer-Mınıstr.