Oljas Bektenov Qulsary qalasyndaǵy turǵyn úılerdi qalpyna keltirý jumystaryn tekserdi
Atyraý oblysy boıynsha barlyǵy 1,3 mlrd teńgege 3652 otbasy 100 AEK mólsherinde birjolǵy kómek aldy.
Óńirde sý tasqynynan barlyǵy 2650 úı zardap shekti. 1 457 úı apatty dep tanyldy, 1 193 úı — kúrdeli jóndeýge jatqyzyldy.
«Úkimet basshysyna Qulsary qalasynyń „Bolashaq“ jańa shaǵyn aýdanynda 100 turǵyn úı salý barysy týraly baıandaldy. Búgingi tańda jumys 72%-ǵa aıaqtaldy: salynyp jatqan 96 nysannyń irgetasy qalandy, 78 úıdiń qabyrǵasy turǵyzyldy, 34-inde tóbesin jabý jumystary bastaldy. Úılerdi osy jyldyń qyrkúıek aıynyń sońyna deıin paıdalanýǵa berý josparlanýda. Shaǵyn aýdandaǵy turǵyn úılerden bólek, 2 myń oryndy Binom mektebi men 300 oryndy balabaqsha salynady. Sondaı-aq jańa úılerdiń bolashaq turǵyndarynyń demalýyna arnalǵan oryndar jabdyqtalady», — delingen habarlamada.
Úkimet basshysynyń tapsyrmasy boıynsha turǵyn úı qurylysynyń merziminde aıaqtalýyn qamtamasyz etý úshin Qulsary qalasy nysandaryndaǵy merdiger uıymdar sany 2,5 esege ulǵaıtyldy. Júrgizilip jatqan jumystyń sapasyn baqylaý maqsatynda ýchaskelerde Gov.kz saıtynda kórsetiletin beınebaqylaý kameralary ornatylǵan.
«Sý tasqyny saldaryn joıý jáne barlyq zardap shekkenderdiń baspana máselesin sheshý Memleket basshysynyń erekshe baqylaýynda. Jumysty tezdetip, múmkindiginshe qysqa merzimde aıaqtaý kerek. Qurylystyń barlyq kezeńin baqylaı otyryp, ár merdigermen jobalyq negizde jumys isteý qajet. Bul turǵyn úıdiń tıisti sapasyn qamtamasyz etý úshin mańyzdy», — dep Oljas Bektenov, ákimdikke qurylys barysynda ınjenerlik kommýnıkatsııalar júrgizý máselesin de sheshýdi eskertti.
Sonymen qatar Qulsaryda sý tasqyny kezinde búlingen avtojoldardy qalpyna keltirý jumystary júrgizilip jatyr. Búgingi tańda josparlanǵan 12,1 shaqyrymnyń 4,9 shaqyrymy jóndeldi. Sondaı-aq sý tasqyny kezinde zardap shekken 215 bıznes sýbektisine ótemaqy tólendi. 1614 sharýa qojalyǵyna mal men úı qustaryna keltirilgen shyǵyn óteldi.
Óz kezeginde, Úkimet basshysyna oqý-aǵartý birinshi vıtse-mınıstri Natalıa Jumadildaeva sý tasqynynan zardap shekken eldi mekender balalarynyń jazǵy demalysyn uıymdastyrý jónindegi tapsyrmanyń oryndalý barysy týraly baıandady. Búgingi tańda qaıyrymdylyq uıymdarymen birlese otyryp, 2 738 oqýshy jazǵy demalyspen qamtylǵan. Balalar oqý-saýyqtyrý ortalyqtary men lagerlerge jiberilide, sondaı-aq «Týǵan elge saıahat» jobasy aıasynda elimizdiń mádenı-tarıhı oryndaryna saıahattap júr.
Premer-Mınıstr múddeli mınıstrlikter men óńir ákimdigine densaýlyq saqtaý jáne bilim berý áleýmettik nysandary — mektepter, kolledjder, balabaqshalar jáne basqa da nysandar salý jáne qalpyna keltirý jumystaryn erekshe baqylaýda ustaýdy tapsyrdy.