Oljas Bektenov Kentaý JEO-nyń jańǵyrtý jumystarymen tanysty

<p>ASTANA. KAZINFORM -<strong> </strong>QR Premer-Mınıstri Oljas Bektenov Túrkistan oblysyna jumys sapary aıasynda Kentaý qalasyndaǵy jylý ortalyǵy men transformator zaýytynyń jumysymen tanysty, - dep habarlaıdy Úkimettiń <a href="https://primeminister.kz/news/olzhas-bektenov-kentau-zheo-zhangyrtu-zhumystarymen-zhane-turkistan-oblysyndagy-onerkasip-salasynyn-damuymen-tanysty-27532" target="_blank" rel="noopener">baspasóz</a> qyzmeti.</p>

Baspasóz qyzmetiniń málimetterine qaraǵanda, 1934 jyly salynǵan Kentaý JEO – qala turǵyndaryn ortalyqtandyrylǵan jylýmen qamtamasyz etetin strategııalyq nysan. Mundaǵy jabdyqtyń tozý deńgeıi 87%-dy quraıdy. Atalǵan nysanda sońǵy ret kúrdeli jóndeý 10 jyldan astam ýaqyt buryn júrgizilgen.

Osyǵan baılanysty Memleket basshysynyń tapsyrmasy boıynsha Kentaý turǵyndaryn jáne áleýmettik nysandardy sapaly jylýmen qamtamasyz etý maqsatynda «Kentaý q. JEO «№7,8,9,10,11,12 qazandyqtaryn kúrdeli jóndeý» jobasy ázirlenip, memlekettik saraptamanyń oń qorytyndysy alyndy. Buǵan deıin demeýshiler esebinen uzyndyǵy 4,7 shaqyrymdy quraıtyn jylý magıstrali, tórt qazandyq jóndeldi. Bıylǵy sáýir aıynda qalǵan eki qazandyqty jóndeý jumystary bastalady, aıaqtalý merzimi – 2025 jyldyń sońy.

«JEO-daǵy elektr energııasynyń generatsııasy ortalyqtyń óz qajettilikterin óteýge de jetpeıdi, al tarıf kúrdeli jóndeý jumystaryn júrgizýge múmkindik bermeıdi. Osyǵan baılanysty Energetıka, Qarjy mınıstrlikterine jylýmen qamtý qyzmetterin sapaly usyný jáne aldaǵy jylytý maýsymynyń turaqty ótýin qamtamasyz etý maqsatynda jóndeý jumystaryn qarjylandyrý nusqalaryn qarastyrýdy tapsyramyn», - dep atap ótti Oljas Bektenov.

Sondaı-aq Premer-Mınıstr Kentaý transformator zaýytynyń óndiristik tsehynda boldy. Bul – 700-den astam adamdy jumyspen qamtyp otyrǵan Kentaý qalasyndaǵy negizgi iri ári qala quraýshy kásiporyn. Zaýytta jalpy maqsattaǵy jáne elektrlendirilgen temirjol kóligi úshin kúshtik transformatorlar, sondaı-aq transformatorlyq qosalqy stansalar shyǵarylady. Kásiporynnyń qýaty jylyna 20 myń ónimdi quraıdy, bul rette ónimniń 30%-y eksportqa shyǵarylady.

Kásiporynda Oljas Bektenov shyǵarylatyn ónimderdiń tehnıkalyq sıpattamalary men konstrýktsııasyn jetildirý boıynsha júrgizilip jatqan jumystarmen, zaýyttyń óndiristik qýatyn keńeıtý sharalarymen tanysty. Nátıjesinde, Úkimet basshysy otandyq elektr jabdyqtaryn óndirýshi úshin qosymsha óndiristik júktemeniń mańyzdylyǵyn atap ótti. Sonymen qatar kásiporyn óndiristi keńeıtý jáne ulǵaıtý, tehnologııalyq operatsııalardy jańǵyrtý jáne tsıfrlandyrý boıynsha qarsy mindettemelerdi qabyldaýy tıis.

Munda Úkimet basshysyna óńdeý ónerkásibin damytý jáne ınvestıtsııalyq jobalardy iske asyrý barysy týraly baıandaldy. Qazirgi tańda 2024-2027 jyldarǵa arnalǵan ınvestıtsııalyq jobalar pýly ázirlendi. Jalpy quny 2,2 trln teńgeni quraıtyn 145 jobany iske asyrý 17,7 myń jumys ornyn ashýǵa múmkindik beredi. Onyń ishinde bıyl 116,8 mlrd teńgege 44 joba iske asyrylatyn bolady. Atap aıtqanda, kúkirt qyshqylyn óndirý, júgerini tereń óńdeý zaýyttaryn salý jobalary, maqta-toqyma klasterin qurý josparlary tanystyryldy. Sonymen qatar óńirde syıymdylyǵy 4 myń tonnalyq zamanaýı kókónis qoımasynyń qurylysy bastaldy.

Premer - Mınıstr ınvestorlardy belsendi tartý úshin qolaıly bıznes-klımat qalyptastyrý boıynsha ákimdikke barlyq qajetti sharalardy qabyldaý, onyń ishinde shaǵyn ónerkásiptik parkter men arnaıy ındýstrııalyq aımaqtardyń aýmaǵyn keńeıtý mindetin qoıdy.