Oljas Bektenov: Qazir bastysy – adam ómirin saqtap qalý jáne apat zardaptaryn azaıtý

<p>ASTANA. KAZINFORM &ndash; QR Premer-Mınıstri Oljas Bektenov TJM-niń Daǵdarystyq jaǵdaılarda basqarý ortalyǵynda tótenshe jaǵdaılar mınıstri Shyńǵys Árinovtiń esebin tyńdady. Aýmaqtyq TJD-lar beınekonferentsbaılanys rejıminde qosyldy.</p>

TJM derekteri boıynsha ákimdiktermen birlesip, 2,3 mln m3 astam aǵyn sý shyǵarylyp, 162 myńnan astam qum toltyrylǵan qapshyq jáne 31 587 tonna ınertti materıal tóseldi. Apattyq-qutqarý jumystaryna 6 349 adam, 2 192 tehnıka, 689 sorǵy quraly jáne t.b. jumyldyryldy.

«Bul – sońǵy jyldardaǵy eń úlken sý tasqyny. Qazir bastysy – adam ómirin saqtap qalý jáne apat zardaptaryn azaıtý. Keıin jekelegen laýazymdy tulǵalardyń óz qyzmettik mindetterine salǵyrt qaraýynyń yqtımal faktilerin anyqtaý maqsatynda egjeı-tegjeıli tekserý júrgiziletin bolady. Men bul máseleni Bas Prokýrormen talqyladym. Búginde barlyq kúsh sý tasqynyna qarsy jumystarǵa jumyldyryldy. Meniń birinshi orynbasarym Roman Vasılevıch Sklıar eń qatty zardap shekken óńirlerde júr» , — dedi Oljas Bektenov.

Úkimet basshysy sondaı-aq soltústik óńirlerde de sý basý qaýpi bar ekenin atap ótti. Buǵan deıin Soltústik Qazaqstan oblysyndaǵy sý toraptarynyń jaǵdaıy tekserilgen bolatyn.

TJM basshylyǵyna elimizdiń barlyq óńirinde baqylaýdy kúsheıtý tapsyryldy.