Oljas Bektenov qaza tapqan ferroqorytpa zaýyty jumysshylarynyń otbasyna kóńil aıtty

<p>ASTANA. KAZINFORM&nbsp;&mdash; Oljas Bektenov Qaraǵandy ferroqorytpa zaýytyndaǵy TJ&nbsp;saldarynan qaza tapqan jumysshylardyń otbasylary men týǵan-týystaryna kóńil aıtty.</p>

«Qaraǵandy ferroqorytpa zaýytyndaǵy qaıǵyly oqıǵa saldarynan adamdardyń qaıtys bolǵany týraly sýyt habardy tereń kúızelispen qabyldadym. Qaza tapqandardyń otbasylary men jaqyndaryna orny tolmas qaıǵylaryna ortaqtasyp, kóńil aıtamyn. Oqıǵanyń sebepterin anyqtaý meniń jeke baqylaýymda. Qaza tapqandardyń otbasyna barlyq qajetti qoldaý kórsetiledi», — dedi Oljas Bektenov.

Búgingi tańda Qaraǵandy ferroqorytpa zaýytynda TJ saldarynan bolǵan apattyń sebepterin tergeý jónindegi arnaıy komıssııa jumys istep jatyr.

Eńbek jáne halyqty áleýmettik qorǵaý mınıstrliginiń málimetinshe, balalary bar qaza tapqandardyń otbasyna asyraýshysynan aıyrylý jaǵdaıyna baılanysty respýblıkalyq bıýdjetten járdemaqy jáne MÁSQ-tan áleýmettik tólemder taǵaıyndalady.

Qaza tapqandardyń otbasy saqtandyrý uıymynan tólemder jáne BJZQ-dan jerleýge birjolǵy tólem alady.

Sonymen qatar jumys berýshi kompanııa jerleý rásiminiń barlyq shyǵynyn, sondaı-aq kelesideı mindettemelerdi:

— qaza tapqan qyzmetkerlerdiń otbasyna 10 jyldyq jalaqy mólsherinde birjolǵy tólem berýdi;

— qaza tapqandar men zardap shekkenderdiń otbasylarynyń turǵyn úı jaǵdaıyn jaqsartýǵa kómektesýdi;

— qaza tapqan qyzmetkerlerdiń otbasy músheleriniń barlyq nesıesin tolyq óteýdi óz moınyna aldy.

Esterińizge sala keteıik, 20 shildede Qaraǵandyda ferroqorytpa zaýytynyń peshinde kenetten jalyn shyqty. TJ saldarynan kásiporynnyń segiz qyzmetkeri zardap shekti.

Olar professor Maqajanov atyndaǵy kópsalaly aýrýhanaǵa jetkizilgen.

Qaraǵandy dárigerlerine elordadan áriptesteri kómekke keldi. 

Osydan úsh kún buryn denesin 85% kúıik shalǵan Mýzafar Ismaılov kóz jumǵan edi. Ol keshe Qaraǵandy oblysynyń Buqar jyraý aýdanyndaǵy Úmitker aýylynda jerlendi.

Keshe denesiniń 90 paıyzyn kúıik shalǵan 25 jastaǵy Erulan Qazken aýrýhanada jan tapsyrdy. Erulan Qaıyrbekuly ferroqorytpa zaýytynda tehnolog bolyp jumys istegen.

Búgin tańerteń Qaraǵandy aýrýhanasynda ferroqorytpa zaýytynda zardap shekken taǵy eki adam qaıtys boldy. 

Taǵy tórt naýqas áli de aýyr jaǵdaıda jatyr.