Oljas Bektenov Halyq qaharmany Raqymjan Qoshqarbaev eskertkishine gúl shoqtaryn qoıdy

<p>ASTANA. KAZINFORM &ndash; Qazaqstan Premer-Mınıstri Oljas Bektenov Jeńis kúnin merekeleý aıasynda Reıhstagqa tý tikken Halyq qaharmany Raqymjan Qoshqarbaevtyń eskertkishine gúl shoqtaryn qoıý rásimine qatysty.</p>

Soǵys jyldarynda qaza tapqan jaýyngerler men beıbit ómirge oralyp, búginde marqum bolǵan barsha ardagerlerdi bir mınýt únsizdikpen eske aldy.

«Adamzat tarıhyndaǵy eń surapyl soǵysta qazaqstandyqtar da teńdessiz erlik pen eren eńbektiń dańqty úlgisin kórsetti. Uly Jeńis qaharmandarynyń arqasynda búgingi urpaq beıbit elde ómir súrip, kemel bolashaqqa nyq senimmen qadam basyp otyr.

Aıbyndy batyrlarymyz Baýyrjan Momyshuly, Saǵadat Nurmaǵambetov, Raqymjan Qoshqarbaev, Álııa Moldaǵulova, Mánshúk Mámetova, Hıýaz Dospanova, Málik Ǵabdýllın, Talǵat Bıgeldınov syndy basqa da kóptegen otandastarymyzdyń maıdan dalasyndaǵy erlikterine máńgi taǵzym etemiz. Halqymyz týǵan jerimizdi qorǵap qalǵan soǵys ardagerleri men tyl eńbekkerleriniń esimderin árdaıym ulyqtaı bermek.

Barshańyzǵa myqty densaýlyq, sarqylmas kúsh-qýat tileımin. Aspanymyz ashyq, elimiz aman bolsyn!», — dedi Oljas Bektenov.