Oljas Bektenov DDU Eýropalyq óńirlik bıýrosynyń basshysymen kezdesti

<p>ASTANA. KAZINFORM &ndash; QR Premer-Mınıstri Oljas Bektenov Dúnıejúzilik densaýlyq saqtaý uıymynyń Eýropalyq óńirlik bıýrosynyń dırektory Hans Klıýgemen kezdesti, dep habarlaıdy QR Úkimetiniń baspasóz qyzmeti.</p>

Kezdesýge qatysýshylar Qazaqstan Úkimeti men DDU-nyń Densaýlyq saqtaý salasyndaǵy ornyqty damý maqsattaryna qol jetkizý jónindegi birlesken jumysyn talqylady.

Atap aıtqanda, 2024-2025 jyldarǵa arnalǵan ekijyldyq yntymaqtastyq týraly kelisim sheńberinde qazirgi ýaqytta densaýlyq saqtaý qyzmetterimen jappaı qamtýǵa qol jetkizý, halyqtyń densaýlyǵyn jaqsartý jáne kadrlyq áleýetti arttyrý máselelerine erekshe nazar aýdarylýda.

DDU – Qazaqstannyń densaýlyq saqtaý salasyndaǵy mańyzdy strategııalyq seriktesi. Birlesken josparly jumystyń, sonyń ishinde tehnıkalyq jáne saraptamalyq qoldaýdyń nátıjesi halyqtyń tynys alý, qan aınalymy júıesi aýrýlarymen syrqattanýshylyq, sondaı-aq qaterli isikterden bolatyn ólim-jitim deńgeıiniń tómendeýi boldy.

Óz kezeginde, Almaty deklaratsııasynyń alǵashqy medıtsınalyq-sanıtarııalyq kómek kórsetý qaǵıdattaryn ustaný eldegi ana men bala ólimi deńgeıiniń tómendeýine, ómir súrý uzaqtyǵynyń artýyna yqpal etti.

«Qazaqstan alǵashqy medıtsınalyq-sanıtarııalyq kómekti nyǵaıtýdyń mańyzdylyǵy týraly máseleni kóterip keledi. Ózderińiz biletindeı, bizdiń Prezıdentimizdiń MSAK jónindegi elder koalıtsııasyn qurý jónindegi bastamasyn DDU bas dırektory jáne Uıymǵa múshe memleketter qoldady. Jenevada ótetin Dúnıejúzilik densaýlyq saqtaý assambleıasynyń 78-shi sessııasy aıasynda múshe memleketter men damý jónindegi áriptesterdiń qatysýymen MSAK boıynsha elder koalıtsııasyn iske qosý bizdiń birlesken jumysymyzdyń mańyzdy qadamy bolmaq», — dedi Oljas Bektenov.

Premer-Mınıstr Qazaqstanda densaýlyq saqtaý mekemelerinde de, úıde de medıtsınalyq qyzmettermen qamtýdy qarqyndy túrde keńeıtip jatqanyn atap ótti.

Óz kezeginde DDU óńirlik bıýrosynyń basshysy Hans Klıýge Qazaqstannyń ulttyq densaýlyq saqtaý júıesiniń turaqtylyǵyn arttyrýda aıtarlyqtaı jetistikterge qol jetkizgenin atap ótti.

Kezdesý qorytyndysyna sáıkes, halyq densaýlyǵynyń joǵary deńgeıine qol jetkizý maqsatynda kórsetiletin medıtsınalyq qyzmetterdiń sapasyn arttyrý boıynsha aldaǵy jumysty kúsheıtý baǵyttary atap ótildi.