Oljas Bektenov: BQO-ny joıqyn sý tasqynynan saqtap qaldyq, endigi mindet — Atyraýdy qorǵaý
Úkimet basshysy Atyraý oblysy basshylyǵynyń aldyna qala men eldi mekenderdi jyljyp kele jatqan tasqyn sýlardan barynsha qorǵaý mindetin qoıdy.
Úkimetke Batys Qazaqstan oblysyndaǵy sekildi jumys uıymdastyrý tapsyryldy, onda sý tasqynyna qarsy aldyn alý is-sharalaryn, jetkizilgen ınjenerlik tehnıkalardy eskere otyryp, 14 óńirden jumyldyrylǵan áskerı qyzmetshiler men qutqarýshylar aýqymdy shyǵynǵa jol bermeı, sý tasqynyn eńserýge múmkindik berdi.
BQO-daǵy jumysqa 11 myńnan astam adam jáne 2 myńǵa jýyq tehnıka tartyldy. Uzyndyǵy shamamen 150 km bolatyn qorǵanys bógetteri salyndy, 1,3 mln qum toltyrylǵan qapshyq tóseldi.
Oral qalasynda 18 turǵyn úı alabyn boılaı turǵyzylǵan bógetter qaýipsizdikti tolyq qamtamasyz etti.
Qalanyń turǵyn úıleri men áleýmettik nysandaryna sý jetken joq. Sý basqan baý-baqsha seriktestikteri men Jaıyq ózeniniń alqabynda ornalasqan birqatar úıdiń turǵyndary aldyn ala qaýipsiz jerge kóshirildi.
Batys Qazaqstan oblysy ákimdiginiń málimetinshe, búginde 909 úıdiń turǵyndary óz úılerine qaıta oraldy, 5 myńnan astam mal basy qaýipsiz jerlerge jaıylymǵa jiberildi.
Búgingi tańda oblystyq jedel shtab pen sý tasqyny saldaryn joıý jónindegi komıssııa 8 myńǵa jýyq ótinim jınap, myńnan astam úıge baǵalaý jumystaryn júrgizdi. 1672 otbasy 100 AEK mólsherinde birjolǵy tólem aldy. Zardap shekkenderge kómek kórsetý jumystary jalǵasýda.
«Sý tasqyny jaǵdaıy turaqtalyp keledi. Batys Qazaqstan oblysynda sý tasqynynyń sharyqtaý shegi bolyp ótti. Munda jumysqa tartylǵan barlyq bólimshelerdiń úılesimdi jumysyn atap ótken jón. Birlesken is-áreketterdiń arqasynda 84 eldi mekendi sý basýǵa jol berilmedi, sondaı-aq óńirdegi sý tasqynynyń saldary barynsha azaıtyldy. Qazir úılerdi qaıtadan sý basý qaýpi seıildi», — dedi Oljas Bektenov. — Tótenshe jaǵdaılar, Qorǵanys, Іshki ister mınıstrlikteriniń, Ulttyq qaýipsizdik komıtetiniń, jergilikti atqarýshy organdardyń, uıymdardyń barlyq qyzmetkerleri men áskerı qyzmetshilerine, eriktilerge jáne sý tasqynyna qarsy is-sharalarǵa qatysqan barlyq janashyr azamattarǵa úlken alǵysymdy bildiremin».
Búgingi kúnniń basty mindeti — Atyraý oblysyn sý tasqynynan qorǵanýǵa daıyndaý. Kún saıyn Jaıyq ózeniniń sý deńgeıi kóterilip keledi. Qaýipti belgige deıin shamamen 100 sm qaldy.
«Qazir úlken sý kólemi Atyraý oblysyna qaraı aǵyp jatyr, aldaǵy kúnderi sharyqtaý shegi kútilýde. Barlyq kúshterdi jumyldyryp, basqa óńirlerden qosymsha kúsh tartqan Batys Qazaqstan oblysynyń tájirıbesin paıdalanǵan jón. Sý deńgeıiniń saǵattyq monıtorıngin qamtamasyz etip, qorǵanys bógetteriniń uzyndyǵy men bıiktigin ulǵaıtý qajet. Biz óńirdi qorǵap, sý tasqynyna jol bermeýimiz kerek», — dep atap ótti Úkimet basshysy.
Búginde Atyraý oblysynda apattyq-qutqarý jumystaryn júrgizý úshin 13 myńnan astam adam jáne 1 200-den astam tehnıka jumyldyrylǵan.
Óńirde 500 km-den astam bóget salyndy, onyń ishinde Atyraý qalasyndaǵy turǵyn alaptardyń boıynda — 242 km, 4,8 mln-nan astam qapshyqtar paıdalanyldy.
Ózen saǵasynda, Kaspıı teńizinde tereńdetý jumystary jalǵasýda: 1 408 m qazylyp, 11 538 m³ topyraq alyp tastaldy.
Qorytyndylaı kele, Úkimet basshysy negizinen el boıynsha sý tasqyny qaýpi seıilgenin atap ótti.
«Prezıdent tabıǵı apattan qıraǵan úılerdi qalpyna keltirý, zardap shekken azamattardy qalypty ómirge qaıtarý boıynsha basym mindet qoıdy. Biz barlyq kúsh-jigerimizdi áleýmettik nysandardy, turǵyn úıler men ınfraqurylymdy salýǵa jáne jóndeýge, adamdarǵa ótemaqy tóleýge baǵyttaýymyz kerek. Barlyq atqarylatyn sharalar naqty ári úılesimdi túrde jasalýy kerek. Ákimdikter turaqty túsindirý jumystaryn júrgizip, zardap shekken turǵyndarmen kezdesýi kerek», — dep qorytyndylady Oljas Bektenov.