Oljas Bektenov aýyldaǵy medıtsına obektileriniń qurylysyn synǵa aldy

<p>ASTANA. KAZINFORM &ndash; Úkimet basshysy Oljas Bektenov aýyldyq jerlerde paıdalanýǵa berilýi tıis densaýlyq saqtaý obektileri qurylysynyń baıaýlyǵyn synǵa aldy.&nbsp;</p>

«Memleket basshysy Úkimettiń keńeıtilgen otyrysynda «Aýylda densaýlyq saqtaýdy jańǵyrtý» ulttyq jobasyn júzege asyrý jumystarynyń tıimsiz júrip jatqanyn aıtty. Bul másele Úkimette birneshe ret qaraldy, biraq ázirge naqty nátıje joq. Ótken jyly 309 densaýlyq saqtaý obektisin salý josparlanǵan edi. Alaıda, jobalyq-smetalyq qujattamany daıyndaý jumystary tym uzaqqa sozylyp ketti», - dedi Oljas Bektenov Úkimet otyrysynda. 

Premer-Mınıstrdiń aıtýynsha, Densaýlyq saqtaý mınıstrligi baqylaýdy álsiretip aldy. 

«Ákimdikter de qurylys oryndaryn anyqtaý, jer ýchaskelerin ýaqytyly bólý boıynsha túrli syltaý aıtyp, máseleni shuǵyl sheshýge nıet tanytqan joq. Jobalaý qujattaryn rásimdeý men saraptama máseleleri de tym kesheýildep ketti. Sondyqtan, aýyldyq jerlerdegi medıtsına obektileriniń qurylysyn bastaý merzimderi buzyldy. Munyń bári jospardyń ózgerýine ákep soqty», - deıdi ol. 

Sondaı-aq, Oljas Bektenov qurylysy ótken jyly bitýi tıis 99 densaýlyq saqtaý obektisiniń ýaqytyly tapsyrylmaǵanyn tilge tıek etti. 

«Áli kúnge deıin 7 obekti aıaqtalmady. Byltyr ákimdikter tıptik jobalardy jergilikti jerge baılanystyrýǵa tıis edi, bul jumys ta aıaqsyz qaldy», - deıdi Úkimet basshysy.