Oljas Bektenov aýyl turǵyndarynyń jappaı kóship ketý sebepterin atady
«Ár aýyl turǵyny turmystyq ahýaldyń jaqsarǵanyn qalaıdy. Ol úshin biz qala men aýyldyń turmys deńgeıindegi alshaqtyqty birtindep qysqartyp kelemiz. Mundaǵy negizgi faktor – qoljetimdi qyzmetter, ıaǵnı sapaly jol, medıtsına men bilim berý sııaqty aýyl halqynyń jaıly turmysyna qajetti ıgilikterdiń bolýy. Qazirgi ýaqytta Óńirlik standarttar júıesine sáıkes, ákimdikterge aýyl turǵyndarynyń turmys sapasyn jaqsartý boıynsha mindetter qoıylyp otyr. Obektiler men qyzmetterdiń naqty tizbesi osy júıede qamtylǵan. Tizbede jazylǵan ıgilikterdiń barlyǵy árbir eldi mekende bolýǵa tıis. Alaıda standarttar júıesin basqa baǵdarlamalyq qujattarmen, sonyń ishinde ulttyq jobalarmen ózara úılestirý máselesi sheshimin tappaı keledi. Osynyń kesirinen aýyldardyń suranystary tıimsiz josparlanady. Mektepter men medıtsınalyq mekemeler – aýyldaǵy eń mańyzdy obektiler. Olarǵa aıryqsha nazar qajet», - dedi Úkimet basshysy.
Onyń aıtýynsha, qazirgi tańda apatty jaǵdaıda turǵan aýyl mektepteri az emes. Densaýlyq saqtaý ǵımarattary tapshy. Keıbir aýyldardyń turǵyndary basqa eldi mekenderge baryp emdelýge, oqýǵa májbúr.
«Sondaı-aq aýyzsý men joldardyń sapasyna, elektr qýaty men uıaly baılanystyń jaǵdaıyna jáne Internettiń qoljetimdi bolýyna qatysty myńdaǵan shaǵym kelip túsedi. Munyń barlyǵy aýyl turǵyndarynyń jappaı kóship ketýine sebepshi bolady. Sondyqtan áleýmettik, ınjenerlik jáne kólik ınfraqurylymyn, ásirese shekara mańyndaǵy aýmaqtardyń ınfraqurylymyn damytý jumystaryn kúsheıtý kerek. Osy mindetterdi kezeń-kezeńmen sheshý úshin salyqtardyń jáne bıýdjetke túsetin tólemderdiń keıbir túrlerin aýyldyq okrýgterdiń bıýdjetine berýdi jalǵastyrý qajet. Sondaı-aq jeke bastamalarǵa belsendi qoldaý kórsetý kerek. Árbir bıznes sýbektisi ekonomıkalyq jaýapkershilikpen qatar, halyq aldyndaǵy áleýmettik jaýapkershiligin de tereń sezinýge tıis», - dedi Oljas Bektenov.
Úkimet basshysy jeke basynyń ǵana emes, týǵan aýylynyń da qamyn oılaıtyn kásipker mańyzdy ınfraqurylymdyq jobalardy iske asyrýda memleketke járdem kórsete alatyndyǵyn basa aıtty.
«Máselen, byltyr Túrkistan oblysynyń Shubarsý aýylynan shyqqan kásipker sol eldi mekenge úlken mektep salyp berdi. Aqmola oblysynyń Qaraótkel aýylynda jeke qarajatqa balabaqsha salyndy. Kásipkerler turǵyn úı qurylysyna, joldardy jóndeýge, kóshelerdi abattandyrýǵa, qoǵamdyq demalys oryndaryn salýǵa qoldaý kórsetýde. Elimizde mundaı jaqsy mysaldar jetkilikti. Ákimdikter aýyl turmysyn jaqsartý isine bıznesti de belsendi jumyldyrýǵa tıis. Sonymen qatar ákimdikter aýyldyq jerlerde kadr tapshylyǵy máselesin sheshýi qajet. Kelgen mamandarǵa, ásirese jastarǵa qoldaý kórsetý kerek. Ol úshin «Dıplommen aýylǵa» jobasy bar. Jalpy, Aýyldyq aýmaqtardy damytý tujyrymdamasynyń is-sharalarynan týyndaıtyn barlyq máseleler jergilikti jerlerde jedel ári turǵyndardyń pikirin eskere otyryp, sheshilýge tıis», - dedi Premer-Mınıstr.