Oljas Bektenov Ádilet mınıstrligindegi ádiletsizdikterdi tizip berdi

ASTANA. QazAqparat - Ádilet mınıstrliginde jemqorlyqqa qarsy kúres taqyrybynda ótken jıynda Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov atalmysh vedomstvonyń qyzmetkerleri jiberetin qatelikterdi tizip berdi, dep habarlaıdy QazAqparat tilshisi.

«Ádep normalary men memlekettik qyzmet týraly zańnamanyń saqtalmaýyna qatysty aıtarym. Osy jyldyń birinshi jartyjyldyǵynda Ádilet mınıstrliginiń 28 memlekettik qyzmetkeri, sonyń ishinde Ádep kodeksin buzǵany úshin 2 qyzmetker, memlekettik qyzmettiń bedelin túsirgeni úshin 4 qyzmetker tártiptik jaýapkershilikke tartyldy», - deıdi Oljas Bektenov.

Quzyrly Agenttiktiń ókili óz baıandamasyn naqty mysaldarmen shegeleı tústi. Máselen, Túrkistan oblysynda Ádep jónindegi keńes Otyrar aýdany Ádilet bóliminiń basshysy M.A. Qasymbaevtyń isin qaraǵan. Belgili bolǵandaı, ol mas kúıde avtokólik júrgizgeni úshin jumystan bosatylǵan. Sol sekildi Jambyl oblysy Ádilet departamentiniń sot oryndaýshysy A.J.Nurhanov qyzmettik mindetin durys atqarmaǵany úshin «qatań sógis» aldy.

Oljas Bektenov sonymen birge, óz qyzmetkerleriniń baspana máselesiniń jaı-kúıi árbir basshynyń nazarynda bolýy kerektigin eskertti.

«Alaıda, mınıstrliktegi baspanany ádiletti túrde bólý tájirıbesin zerttep kórgenimizde, keıbir qyzmetkerler jataqhanadaǵy oryndy Turǵyn úı komıssııasynsyz-aq alatynyna kózimiz jetti. Mysal keltireıin. Mınıstrlikke 2017 jyldyń sońynda jumysqa turǵan G.S.Tapeevke jataqhanadan 2 oryn beriledi de, al 2017 jyldyń qańtar aıynda jataqhana ornyna ótinish berip qoıǵan qyzmetkerler áli de kezekte tura beredi», - deıdi Oljas Bektenov.

Agenttik tóraǵasynyń orynbasary atap ótkendeı, memorgandardyń memlekettik qyzmetti kórsetý sapasy saralanatyn tıimdilikti baǵalaý qorytyndysy boıynsha, byltyr Ádilet mınıstrliginiń jumysyna «tıimdiligi tómen» degen baǵa berilgen.

Onyń aıtýynsha, 2017 jyly qyzmet kórsetý merziminiń buzylýy turǵysynan (atalmysh mınıstrlik pen oǵan qarasty vedomstvolarda) 204 fakti tirkelgen. Sonymen birge, agenttiktiń tekserýi aıasynda bıyl mınıstrliktiń ortalyq apparatynda memlekettik qyzmetti kórsetýde negizsiz bas tartý boıynsha 20 jaǵdaı tirkelgen. Oljas Bektenov óz baıandamasynda árbir kemshilikterdi mysalmen keltirdi.