Ólketanýshy: Saıası qýǵyn-súrgin qurbandaryn tutas aqtaıtyn qujat qabyldanýy tıis
Mundaı pikirdi ol Shyǵys Qazaqstan oblysynyń ákimdigi men Saıası qýǵyn-súrgin qurbandaryn tolyq aqtaý jónindegi memlekettik komıssııanyń jobalyq keńsesi ótkizgen respýblıkalyq semınarda aıtty.
«Batys Qazaqstan delegatsııasy qazirgi ýaqytta Almaty qalasynda 10 kúndik issaparǵa shyǵyp, arhıvterde jumys istep jatyr. Osy jumysqa Prezıdent arhıvi men Ulttyq kitaphana tarapynan jan-jaqty qoldaý kórsetilip otyr. Óńirimizdiń arhıvindegi qujattar onlaın formatta da qoljetimdi. Bul júgimizdi birshama jeńildetip, ýaqyt únemdeýge múmkindik beredi. Osy oraıda elimizdiń túkpir-túkpirindegi arhıvterge málimetterdi saıtqa jarııalaý jaıly usynys jasaǵym keledi», - dedi Aıbolat Qurymbaev.
BQO óńirlik jumys tobynyń jetekshisiniń aıtýynsha, 2009 jyly «Bosqyndar týraly» QR Zańynda jáne 1951 jylǵy «BUU bosqyndar mártebesi týraly Jeneva konfentsııasynda» adamdy bosqyn dep tanýdyń sharttary kórsetilgen.
Al qýǵyn-súrgin qurbandary týraly arhıv derekterinde bosqyndar degen uǵym kezdespeıdi.
«Sondyqtan aqtaý protsesinde «bosqyn» termıninen góri «aýa kóshýshiler» degen uǵymdy paıdalaný utymdy bolar edi. Sondaı-aq 1916-1930 jyldary elden ketýge májbúr bolǵan halyqty tutas aqtaıtyn qujattyq akt qabyldaný qajet dep oılaımyn. Aýa kóshýdi bastap, jurtty aman saqtap qalýdy kózdegen jetekshiler ult janashyry retinde dáriptelip, elimizdiń táýelsizdigi jolynda kúresken tulǵalarmen teń dárejedegideı laıyqty baǵaǵa ıe bolýy tıis», - dedi A.Qurymbaev.