Ólketanýshy Abaıǵa qatysy bar Semeıdegi úıdi kórsetti

SEMEI. QazAqparat – Semeılik ólketanýshy Shafkat Faızýllın tatar ólkesinde uly oıshyl Abaıdyń ózi toqtaǵan úıdi kórsetip, ol jaıynda baıandap berdi, dep habarlaıdy QazAqparat.

Sh.Faızýllın Abaıdyń Semeıdegi gýbernatordyń qabyldaýyna barǵanda aýdarmashy, orys tilin jaqsy meńgergen tegi Jınalıev delingen Altaı qazaǵymen tanysqanyn aıtady. Tanysqannan keıingi biraz áńgime barysynda Abaı onyń Ertis jaǵalaýynda ornalasqan úıine túsý týraly sheshim qabyldaıdy.

«Men osy ólkedegi tatarlar týraly kóp materıal jınaǵan edim. Sondaı kezekti bir izdený barysynda Jınalıevtiń nemere qyzymen tanystym, ol maǵan Abaı týraly, onyń osy úıge túskeni týraly aıtyp berdi. Osy Tatar ólkesinde Jınalıevterdiń atasy turatyn. Sol úıdegi úlken ájesine Abaıdyń fotosýretin kórsetken eken, ájesi onyń Ibrahım ekenin, solardyń úıinde qonyp shyqqanyn aıtty. Basqa egjeı-tegjeılerin bile bermeımin. Jınalıevtiń nemere qyzy qaıtys bolǵan», - dep atap ótti ólketanýshy.

Aıta keterligi, kezinde Abaıdyń ózi turaqtaǵan, qonaqta bolyp shyqqan delingen úı Chaıjúnisov kóshesinde áli kúnge deıin saqtalyp qalǵan eken. Ólkentanýshy QazAqparat tilshisine bul úıdi kórsetti. Birqabatty bóreneden salynǵan úı eken.

Sh.Faızýllınnyń aıtýynsha, álgi aýdarmashynyń Ǵanı esimdi uly bolǵan eken. Ol sol kezde mal satýmen aınalysqan degendi de alǵa tartady.

Aıta ketsek, Abaı murajaı úıi bul faktini teriske shyǵarǵan joq. Degenmen, rastaı almaıtyndaryn da aıtady.

Eske sala ketsek, Semeı qalasynda «Alash arystary – Muhtar Áýezov» murajaı úıi bar. Bul úı 1898 jyly Ánııar Moldabaevtiki bolǵan. Oǵan bul úıdi satyp alýǵa Abaıdyń ózi kómektesip, keıin onda kóp ret toqtaǵan eken.