Olımpıadanyń shırek fınalyna shyqqan short-trekshiler óz áserlerimen bólisti
Nurbergen Jumaǵazıev:
- Búgingi nátıjelerimizdi óte keremet dep aıta almaımyn. Biraq, shırek fınalǵa óttik. Meniń óz josparym boıynsha jarys bastala salyp, alǵashqy orynǵa shyǵý boldy. Jospar boıynsha jarysty bastadym. Alaıda, birinshi aınalymnan keıin Qytaı sportshysy aldymdy orap ketti. Negizi men osy maýsym boıy 1000 jáne 1500 metrge daıyndalyp kelgen bolatynmyn. Olımpıada qarsańynda 500 metrge óte az ýaqyt daıyndaldym. Soǵan qaramastan, bar kúshimdi saldym. Maǵan eń qıyny osy eń jaqyn 500 metrlik qashyqtyq. Endi, shırek fınalǵa ótkennen keıin ary qaraı jartylaı fınalǵa, odan ótsek fınalda óner kórsetýge bar kúshimdi salamyn.
Abzal Ájiǵalıev:
- 500 metr qashyqtyqta júgirý óte qıyn boldy. Bul eń qysqa aralyq bolǵandyqtan birden bárinen ozyp ketý óte qıyn. Jarys barysynda bar kúshimdi salyp, eń birinshi aldymdaǵy Japon sportshysynyń aldyna shyqtym. Odan keıin, reseılik Pavel Sıtnıkovty da basyp ozýǵa kúshimdi saldym. Sol kezde ol ereje buzyp, jolymdy bógedi. Sonyń kesirinen tóreshiler oǵan penaltı berip, jarystan shettetti. Mine, sol sebepti men tóreshilerdiń sheshimi boıynsha shırek fınalǵa ótip kettim. Endi, jartylaı fınalǵa shyǵý úshin daıyndalamyz.
Denıs Nıkısha:
- Ózderińiz kórgendeı jarys aldynda sportshylardyń biri konkıimdi syndyryp, qaıta aýystyrýǵa týra keldi. Sosyn, qosalqy konkıdi kıip shyqtym. Oǵan kóńil kúıimdi túsirgen joqpyn. 500 metrlik aralyq óte shapshań qımyldaýdy qajet etedi. Ózińmen birge synǵa túsken ár sportshy ishki jolǵa talasady, aldyǵa ozýǵa umtylady. Tipti, bir-birin basyp ozý úshin joldan ıterip jiberedi. Sebebi, bul Olımpıada oıyndary. Sol úshin bári táýekelge barady. Mine, jarys barysynda ózimniń básekelesterimniń biri kanadalyq sportshy jolda meni ıterip jibergeni úshin penaltı aldy. Bul meniń shırek fınalǵa ótýime múmkindik berdi. Jalpy jarysta ereje buzbaǵan durys.