Olımpıadany tuńǵysh ret elimizdiń bes birdeı telearnasy kórsetedi
Bul týraly Kazinform tilshisine eksklıýzıv suhbat bergen QR Týrızm jáne sport mınıstriniń qoǵammen baılanys jáne BAQ jónindegi keńesshisi Dıas Ahmetshárip aıtyp berdi.
«Bıylǵy, ıaǵnı Parıj-2024 Olımpıada oıyndaryn tuńǵysh ret elimizdiń bes birdeı telearnasy tikeleı efırde kórsetkeli otyr. Ol — Qazaqstan, Qazsport, „Habar“, „El arna“ jáne Jibek Joly telearnalary. Osy atalǵan bes arna oıynnyń resmı ashylý saltanatyn birdeı ýaqytta tikeleı efırde kórsetedi. Al oıyn bastalǵannan keıin ár arna jarysty sport túrine qaraı ártúrli ýaqytta tikeleı kórsete bastaıdy. Qaı arna qaı básekeni kórsetetinin ózara bólisip alǵan. Biraq sonyń ishinde jarystyń basym bóligin Qazsport telearnasynan tamashalaı alasyzdar. Sebebi ol — arnaıy mamandandyrylǵan sport arnasy», -dedi mınıstrdiń keńesshisi.
Esterińizge sala keteıik, qazirgi tańda tórtjyldyq dodaǵa joldama jeńip alǵan qazaqstandyq sportshylarymyz sońǵy oqý-jattyǵý jıyndaryn ótkizip jatyr.
Qazaqstan quramasy Olımpıada oıyndaryna sporttyń 25 túrinen 92 joldama jeńip aldy.
Naqtyraq aıtsaq, olar boks, dzıýdo, sportttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tennıs, veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademııalyq esý, kórkem gımnastıka, trıatlon, ústel tennısi, quzǵa shyǵý jáne breıkıngten Olımpıada oıyndarynda synǵa túsedi.
Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵyna belgilengen.
Oıynǵa álemniń 205 elinen 10 500 sportshy qatysady.
Onda 32 sport túrinen 329 medal jıyntyǵy sarapqa salynady.