Olımpıadaǵa joldama alǵan aqtóbelik sportshylarǵa 1 mln teńgeden berildi

AQTÓBE. QazAqparat – Búgin Aqtóbe oblysynyń ákimi Ońdasyn Orazalın Tokıo Olımpıadasyna joldama alǵan Meırambek Aınaǵulov pen Nurıslam Sanaevty qabyldady, dep habarlaıdy QazAqparat tilshisi aımaq basshysynyń baspasóz qyzmetine silteme jasap.

Kezdesýge oblystyq Dene shynyqtyrý jáne sport basqarmasy basshysynyń mindetin atqarýshy Nurbol Sydyqov jáne grek-rım kúresinen QR eńbek sińirgen bapkerler Raqymjan Baqytjanov pen Baýyrjan Nurmahanov, «Er baqyt» áskerı-patrıottyq klýbynyń tóraǵasy, aýǵan soǵysynyń ardageri Marat Qoılybaev qatysty.

Óńir basshysy balýandardy jeńisterimen quttyqtap, alǵysyn bildirdi. «Erkin jáne grek-rım kúresinen Aqtóbe óńiriniń sportshylary respýblıkada aldyńǵy qatardan kórinip júr. Halqymyzda »baq shaba ma, bap shaba ma« degen jaqsy sóz bar. Sport - rýh pen namystyń birdeı kórinetin eń úzdik salasy. Osyndaı batyr balýandarymyzdy daıarlap júrgen bapkerlerdiń jumysyna úlken rızashylyǵymdy bildiremin. Jınaǵan mol tájirıbe men biliktiń arqasynda osyndaı dárejege jettik. Etken eńbek, tókken ter aqtalyp, búgin mine, úlken dodaǵa joldama alyp kelip otyrsyzdar. Osy arqyly sizder Aqtóbe óńiriniń ǵana emes, el maqtanyshy, keıingi jas býynǵa úlgisizder. Namysty qoldan bermeı týǵan jerdiń atyn shyǵarǵandaryńyz úshin alǵys bildiremin», - dedi oblys ákimi. N.Orazalın sportshylardyń jattyǵýlaryna barlyq jaǵdaı jasalatynyn atap ótti.

«Eshteńege alańdamaı, jattyǵyp, aldaǵy jyly Tokıo qalasynda ótetin Olımpıada oıyndarynda elimizdiń namysyn abyroımen qorǵaıdy dep senemin», - dedi.

Kezdesý sońynda aımaq basshysy qos sportshy men olardyń jattyqtyrýshylaryna alǵysyn bildirip, aqshalaı sertıfıkattar tabystady.