Olımpıadaǵa qatysqan tuńǵysh qazaq qyzy Mońǵolııada marapattaldy
«Kaznews» saıtynyń jazýynsha, Aldanysh Ramazanqyzy 1964 jylǵy Tokıo qalasynda ótken olımpıada oıyndaryna Mońǵol eliniń atynan qatysqan.
«Ári Mońǵolııa sporty tarıhynda tuńǵysh ret olımpıadaǵa qatysqan áıel retinde aty altyn árippen jazylǵan. Ol qazaq dıasporasynan shyqqan tuńǵysh sport sheberi ekenin atap ótkenimiz jón bolar. Mońǵol eliniń rekordyn birneshe ret jańartqan. On eki dúrkin elimizdiń chempıondyq tuǵyryna kóterilgen, shashasyna shań juqpaǵan jelaıaq», - delingen saıttyń aqparatynda.
Aıta keteıik, Aldanysh Ramazanqyzy 1945 jyly Baı-Ólke aımaǵynyń ortalyǵy Ólgeı qalasynda dúnıege kelgen. Qazaq tarıhynda jeńil atletıkadan shyqqan tuńǵysh sport sheberi, Mońǵolııanyń tuńǵysh olımpıadashysy, shırek ǵasyrǵa jýyq rekordy buzylmaǵan sportshy, halyqaralyq jarystan tuńǵysh medal ákelgen jeńil atlet, jelaıaq júırik, ozat bapker-ustaz Aldanysh Ramazanqyzy qazir Ulanbatyr qalasynda ómir súrip jatyr.
Ulanbatyrdaǵy orta mektepte oqyp júrgeninde-aq júgirýden sheberligin baıqaǵan sol kezdegi memlekettik sport komıteti jeńil atletıka bóliminiń jattyqtyrýshysy men Keńes elinen kelgen sport mamany 5-synyptyń oqýshysyn jeńil atletıka seksııasyna qabyldaǵan. Keshikpeı talantty qyz ulttyq quramanyń sapyna qosylyp, 1961 jyldan 1969 jylǵa deıin ulttyq quramada óner kórsetti.
Ashyq derekkózderdiń málimetinshe, 1962 jyly Mońǵol eliniń tarıhynda alǵash ret búkilhalyqtyq spartakıada ótken bolatyn. Osyǵan 16 jasynda qatysqan Aldanysh 200, 400, 800 metrlik jarystardan el rekordyn jańartqan. Bul óz ýaqytynda buryn-sońdy bolmaǵan eleýli jetistik edi. Aldanysh Ramazanqyzynyń 200 metr qashyqtyqqa jasaǵan rekordy úsh jyldan keıin jańardy. Al, 400 jáne 800 metr qashyqtyqtaǵy rekordyn 22 jyl boıy eshkim buza almaǵan. Bir qyzyǵy sol – Aldanysh Ramazanqyzynyń 800 metr qashyqtyqqa toqtatqan rekordyn 1984 jyly taǵy bir qazaq qyzy, Mońǵolııa Memlekettik ýnıverstettiń túlegi Kúshaı Qulybekqyzy jańartypty.
Sondaı-aq, 1966 jyly Taýly Altaı ólkesinde ótken Mońǵol-Keńes elderiniń stýdent-jastar festıvalyna qatysyp, júgirýden altyn medal ıegeri atanǵan. Respýblıkalyq quramada júrgen jyldary Bakýde ótken halyqaralyq týrnırde alǵan kúmis medali – Mońǵolııanyń jeńil atletıka tarıhynda halyqaralyq jarystan ákelgen alǵashqy medali retinde tirkelgen.