Olımpıadaǵa irikteý týrnıri: Áıelder boksynan alǵashqy jeńimpaz anyqtaldy

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde áıelder boksynan Valentına Halzova alǵashqy jeńisine qol jetkizdi, dep habarlaıdy QazAqparat tilshisi.

69 keli salmaqta synǵa túsken jerlesimiz alǵashqy aıqasyn Ońtústik Koreıa ókili Sıýen Choıǵa qarsy ótkizip, tóreshilerdiń biraýyzdy sheshimimen jeńimpaz dep tanyldy.

Bul Erik Alǵabek jattyqtyratyn qyzdar komandasynan jeńiske jetken alǵashqy boksshy qyz.

Esterińizde bolsa osyǵan deıin sharshy alańǵa qazaqstandyq eki boksshy qyz shyǵyp, ekeýi de birinshi aıqastarynda qarsylastarynan utylyp qalǵan bolatyn.

Esterińizge sala ketsek, lıtsenzııa úshin talasty birinshi bolyp bastaǵan Dámetken Kelimbet

(57 keli) qytaılyq In ıÝnhýaǵa jol berse, Rımma Volosenko (60 keli) úndistandyq Sımrandjıtkaýr Baattan jeńildi.

Aıta keteıik, endi sanaýly mınýttardan keıin taǵy bir boksshy arýymyz 75 kelidegi Nadejda Rıabets ózbekstandyq Navbahor Hamıdovamen judyryqtasady. Sondaı-aq, erler arasynda 69 keli salmaqta Abylaıhan Júsipov sharshy alańǵa shyǵady.