Olımpıadaǵa deıin alynǵan dopıng-synama 10 jylǵa deıin saqtalady - WADA

NUR-SULTAN. QazAqparat - Mádenıet jáne sport vıtse-mınıstri Eldos Ramazanov bastaǵan qazaqstandyq delegatsııa Katovıtsede WADA uıymynyń bas dırektory Olıver Nıggle jáne WADA-nyń Azııa óńirindegi keńsesiniń basshysy Kazýhıro Haıashımen kezdesti, dep habarlaıdy QazAqparat tilshisi.

Dene shynyqtyrý jáne sport komıtetinen málim etkendeı, kezdesý sporttaǵy dopıng máselelerine arnalǵan V Búkilálemdik Dopıngke qarsy konferentsııa aıasynda ótti. Qazaqstandyq tarap dopıngke qarsy erejelerdi buzǵany úshin jaýapkershilikti qatańdatý, Ulttyq dopıngke qarsy uıymnyń mártebesin arttyrý suraqtaryn qamtıtyn zań jobasy týraly keńinen aıtyp berdi. Óz kezeginde Nıggle myrza Qazaqstan Úkimetiniń atalǵan baǵytta qolǵa alyp jatqan reformalaryn joǵary baǵalap, bolashaqta dopıngpen kúres máselesinde yntymaqtastyqtyń nyǵaıatynyna senim bildirgen.

Aıta ketsek, dene shynyqtyrý jáne sportqa qatysty zań jobasy Májilistiń ekinshi oqylymynda maquldanyp, SQR Parlamenti Senatynyń qaraýyna jiberilgen bolatyn.

Óz kezeginde, Kazýhıro Haıashı dopıng-synamalardyń saqtalýy júıesiniń reformalanyp jatqanyn aıta ketti.

«Olımpıada oıyndaryna deıin alynǵan dopıng-synama bolashaqta 10 jyl saqtalady. Bul dopıng-synamalardy saqtaý men olardy qaıtadan saraptamadan ótkizýdiń jahandyq baǵdarlamasy bolmaq»,- deıdi Haıashı.

Sonymen qatar, qos tarap dopıngke qarsy kodeks pen halyqaralyq dopıngke qarsy standarttardyń qaıta qaralý protsesin talqylady. Jańa halyqaralyq standartqa súıensek, qandaı da bir eldiń dopıngke qarsy agenttigi halyqaralyq kodekske saı kelmeıtin bolsa, sol eldiń sportshysy jarystan shettetiledi. Onyń qatarynda Olımpıada oıyndary da bar.

Eske sala keteıik, 2017 jyldyń jeltoqsanynda WADA uıymy dopıngke qarsy kodeks pen halyqaralyq dopıngke qarsy standarttardy qaıta qaraý protsesin bastaǵan bolatyn. Sodan beri 2000 túzetýler óńdelip, ózgeriske ushyraǵan qujatty álemdik zańgerler saraptaýdan ótkizgen. 2017 jyldan beri qaralyp kele jatqan ózgerister Polshadaǵa konferentsııanyń da basty taqyryptarynyń biri bolmaq.

5 qarashada Polshanyń Katovıtse qalasynda sporttaǵy dopıng máselelerine arnalǵan V Búkilálemdik Dopıngke qarsy konferentsııa bastaldy. Atalǵan jıynǵa búkil álemnen 1000-nan astam delegat qatysyp jatyr. Kún tártibinde – dopıngpen kúres máselesi. Sondaı-aq, konferentsııa barysynda Polshanyń sport jáne týrızm mınıstri Vıtold Banka Búkilálemdik Dopıngke qarsy Agenttik uıymynyń (WADA) basshysyna taǵaıyndalady.