Olımpıadaǵa daıyndyqty toqtatqan emespiz – Short-trekten bas bapker

NUR-SULTAN. QazAqparat - Tórt jyldyqtyń tartysty dodasyna sanaýly kúnder qaldy. Elimizdiń 32 atleti sporttyń 8 túrinen 82 joldama jeńip aldy. Onyń ishinde Abzal Ájiǵalıev, ıAna Han (short-trek), Dmıtrıı Morozov (konkımen júgirý) – elordalyq sportshylar, dep habarlaıdy QazAqparat.

Elorda ákimdiginiń resmı saıtynda málim etilgendeı, joldama ıegerleri qatań saqtyq sharasyn saqtaı otyryp, jattyǵýlaryn jalǵastyrýda.

Aıta keteıik, Abzal Ájiǵalıev buǵan deıin birneshe márte Olımpıada oıyndaryna qatysqan tájirıbeli atlet. Álem chempıonattary men Álem kýbogynyń jeńimpazy. Memleket basyshysy álemdik doda aldynda sportshylardy qabyldaǵan sátinde Abzalǵa Memlekettik týdy tabystap, el mereıin ústem etedi dep senim bildirdi.

Short-trekten Qazaqstan rekordyn jańartqan ıAna Hanǵa da artylar senim mol. Jas sportshy óziniń alǵashqy Olımpıadasy qarsańyndaǵy erekshe sezimderimen bólisti.

«Olımpıadaǵa baratyn bes sportshynyń qataryna engenime áli kúnge deıin sene almaı otyrmyn. Eń sońyna deıin aralas estafeta boıynsha Beıjińde el namysyn qorǵaıtynymdy bilmedim. Jekeleı synda joldama alý úshin maǵan eki saty jetpeı tur edi. Onyń ústine, bul meniń eresekter arasyndaǵy alǵashqy álem kýbogym bolatyn. Sondyqtan qatty qobaljydym. Shynymdy aıtsam, Olımpıadaǵa qatysatynyma áli senbeı turmyn. Maǵan bul qoljetpes arman edi. Sol armanymnyń oryndalǵanyna qýanyshtymyn. Daıyndyq jaqsy ótip jatyr, negizinen, jyldamdyqqa jumys istep jatyrmyz. Biz estafetaǵa, jigitter jaǵy jekeleı synǵa jattyǵýda», - dedi ıAna.

4-20 aqpan aralyǵynda Qytaı astanasynda ótetin aq Olımpıadaǵa 95 elden 4 myńǵa jýyq sportshy barady dep josparlanyp otyr. Sporttyń 15 túri boıynsha 109 medal jıyntyǵy sarapqa salynady.

«Biz úlken jumys atqardyq. Jospar boıynsha 10 lıtsenzııa alýdy kózdegenbiz. Biraq bir joldama kem tústi. Eki lıtsenzııany Olga Tıhonova jeńip aldy. Odan bólek, eki er adam, eki áıel adam synǵa túsetin qosymsha estafeta bar. Atalǵan estafetada bizdiń komanda 12-oryn ıelendi, sol sebepti, bizdiń qyzdar komandasyna taǵy bir joldama berildi. Bul básekege ıAna Han daıyndalýda. Sońǵy álem kýbogynda ol 500 metrge júgirýden óte jaqsy nátıje kórsetip, Qazaqstan rekordyn jańartqanyn umytpaý kerek», - dedi short-trekten QR komandasynyń bas bapkeri Mádiǵalı Qarsybekov.

Azııa men álem chempıonatynyń jeńimpazy Dmıtrıı Morozov XXIV qysqy Olımpadada 1500 m qashyqtyqta sheberligin synǵa salady. Bul qashyqtyqta Dmıtrıı sátti óner kórsetip júr.

Ulttyq qurama 27 qańtar kúni Nur-Sultan men Almaty qalasy arqyly attanady dep josparlanýda.

«Erler arasyndaǵy básekede Abzal Ájiǵalıev, Ádil Ǵalıahmetov pen Denıs Nıkısha baq synaıdy. 500 metrge jarysýdan úsheýi de synǵa túsedi. Abzal – komandanyń kóshbasshysy. Biz daıyndyqty toqtatqan emespiz. Bári de karantın sharalaryn saqtaýda. Bizdiń maqsatymyz – oıynǵa 100 paıyz indetten saý sportshylardy aparý», - dedi komandanyń bas bapkeri Mádiǵalı Qarsybekov.