Olımpıadaǵa barar aldynda Almatyda jattyǵý ótkizemiz - balýan Meırambek Qartbaı
- Aqtóbe úshin osy aımaqta týyp-ósken sportshynyń Olımpıadaǵa joldama alýy úlken jańalyq. Siz osy joldamaǵa qol jetkizý jolynda qandaı belesterdi baǵyndyrdyńyz?
- Olımpıadaǵa joldama alǵanyma óte qýanyshtymyn. 2023 jyly Serbııa elinde álem chempıonaty boldy. Sol Álem chempıonatynda 6 beldesý ótkizip, sońǵy beldesýinde reseılik balýanǵa ese jiberdim. Ol balýan sol kezde lıtsenzııa aldy. Bıyl ol Olımpıadaǵa barmaǵan soń joldama maǵan buıyrdy. Qazir biz Daǵystanda oqý-jattyǵý jıynynda júrmiz. Daıyndyq óte jaqsy. Sońǵy jattyǵý óz elimizde, Almaty qalasynda ótedi.
- 2016 jyldan beri bir salmaqta, 57 keli salmaǵynda kúresip júrsiz. Bir salmaqty ustap turý qıyn ba? Álde bir salmaqtaǵy turaqtylyq qarsylasty jiti bilýge kómektese me?
- Shynymen de, 2016 jyldan bastap bir salmaqty ózgertpedim. Sol salmaqta kúresip júrmin. Bul ońaı emes. Salmaq tastaý, salmaq qýyp kúresý shydamdylyqty talap etedi. Arman-maqsatymyz úshin barlyǵyna tózýge týra keledi.
- Buǵan deıin ózińizge jeńis ákeletin eki ádis týraly aıtyp edińiz. Áli de solaı ma álde jańa tásilder bar ma?
- Ózim úırengen, sátti iske asyra alatyn eki ádisim bar. Bul ras. Eshteńe de ózgergen joq. Sony damytyp, shyńdap jatyrmyz.
- Olımpıada joldamasy qolyńyzda. Qaı eldiń balýandary siz úshin basty qarsylas bolyp sanalady?
- Kez kelgen qarsylas – myqty. Árqaısysyna daıyn bolýymyz kerek. Eshkimdi bóle almaımyz. Sebebi ár eldiń eń myqtysy ǵana Olımpıadaǵa keledi.
- Jeńis tileımiz!
Aıta keteıik, Meırambek Qartbaı — Aqtóbe oblysy Temir aýdanynyń týmasy. Ol kúres úıirmesine 2009 jyldan bastap qatysyp, keıin Eset batyr atyndaǵy mektep-ınternatta oqydy. Keıin Almaty oblysyndaǵy respýblıkalyq sport kolledjinde tájirıbesin jetildirdi. 2021 jyly QazAqparatqa bergen suhbatynda «Sportshy úshin el týyn kóterip, ánuranyn qosyla shyrqaý eń úlken baqyt. Álem chempıonatynda, Olımpıadada top jaryp, kók baıraǵymyzdy bıikke kóterip, jeńis turǵynynan kórinsem dep armandaımyn» degen bolatyn.