Olımpıada júldegerlerine qandaı syılyqtar berilip jatyr
Sportshylar men bapkerler 1 mlrd-tan astam aqsha alady
Jalpy, Olımpıada bastalmaı turyp-aq Qazaqstan altyn alǵan sportshyǵa – 250 myń dollar (119 mln teńgeden asa), kúmis medal úshin – 150 myń dollar (71 mln teńgeden asa), qola júldege – 75 myń dollar (36 mln teńgege jýyq) beretini anyq edi. Jarysta júldeger atanǵan sportshylardyń esimderi anyq, medaliniń sanatyna baılanysty aqshalaryn alady.
Aıtpaqshy, memleket 4-6 oryn alǵan sportshylardy da qatardan qaldyrmaıdy. Máselen, 4-oryn ıelengender – 30 myń dollar, 5-oryn – 10 myń dollar jáne 6-orynǵa turaqtaǵandarǵa 5 myń dollar tólenedi. Munda memlekettiń eki ese shyǵyndanýǵa týra keletin tustary bar. Komandalyq jarystarda árbir sportshy tolyq somany alady. Pnevmatıkalyq vıntovka atýdan komandalyq qola úshin Qazaqstan Aleksandra Le men Islam Sátpaevtyń árqaısysyna 75 myń dollardan úlestiredi. ıAǵnı, eki sportshy birlesip qorjynǵa bir qola medal salǵanymen, árbirine belgilengen mólsherde aqsha berilip, memleket 150 myń dollarǵa shyǵyndalady.
Sonda Qazaqstan 1 altynǵa – 250 myń dollar, 3 kúmiske – 450 myń dollar, 3 qolaǵa – 300 myń dollar, 5-oryn ıelengen 6 sportshyǵa – 60 myń dollar, 6-oryn alǵan 6 sportshyǵa – 30 myń dollar beredi. Sonda barlyǵy 1 mln 90 myń dollar.
Budan bólek, aqshalaı syılyqtan júldegerlerdiń bapkerleri de qaǵylmaıdy. Mysaly, Olımpıada chempıony atanǵan Eldos Smetovtyń 3 bapkeri bar – alǵashqy, jeke jáne ulttyq quramadaǵy. Olarǵa da jalpy somasy 250 myń dollar beriledi. Eger bárin sanamalap otyrar bolsaq, sportshylar men bapkerler úshin memleket teńgemen eseptegende 1 mlrd-tan astam somaǵa shyǵyndalatynyn kóremiz.
Degenmen bulardy syı-qurmettiń alǵysharty dep túsindirsek bolady. Óıtkeni federatsııa men sportshy týyp-ósken óńirdiń ákimdikteri de beretin marapattar jeterlik. Qaltaly azamattar da óz atynan qalaǵanynsha qurmet kórsetedi.
Jylqy, saǵat, páterden bastap qymbat kólikter bar
Qazaqstan atyn álemge tanytyp, úsh Olımpıada boıy júldeger atanyp, keıingisinde chempıon bolǵan Eldos Smetov elge kele sala memleket beretin qarjylaı qoldaýdan buryn kóptegen syıǵa ıe boldy. Áýeli týǵan jeri Tarazdan 5 bólmeli páter berildi. Kóp uzamaı Jambyl oblysynyń ákimi Erbol Qarashókeev Olımpıada chempıonyna páter men Lexus Lx 600 kóliginiń kiltin tabys etti. Chempıonnyń bapkeri Ǵalymjan Jylgeldıev de marapatsyz qalmaı, 2 bólmeli páter men Hyundai Santa Fe kóliginiń kiltin aldy. Eldostyń alary munymen bitpeıdi. Qazaqstandyq tanymal kásipker Jumabek Janyqulov pen Májilis depýtaty Rýslan Berdenov Parıjde altyn alǵan Eldos Smetovke kólik syılaǵysy keletinin alǵash bolyp málimdegen. Al aqtóbelik kásipker Ánýar Aqmyrzauly Olımpıada chempıonyna quny 100 mıllıon teńge bolatyn 100 asyl tuqymdy jylqy syılady. Aıtpaqshy, Smetov syıǵa alǵan ekinshi kóligin alǵashqy bapkeri Ahmet Jumaǵulǵa bergen.
Parıj Olımpıadasynda grek-rım kúresinen 77 keli salmaqta kúmis júlde ıelengen Demeý Jadyraevqa kórsetilip jatqan qoshemet erekshe ekenin baıqadyq. Jetisý oblysynyń ákimi Beıbit Isabaev sportshyǵa «Jetisý oblysynyń Qurmetti azamaty» tósbelgisin taqty. Anasy Kúlıpa Bıjanovaǵa saltanatty túrde qurmet kórsetip, Jarkent qalasynan jańa úıdiń kiltin tabystady. Al týǵan jeri Panfılov aýdanynda sportshyǵa Toyota Land Cruiser 300 mingizip, 50 000 dollardy qolyna ustatty. Odan bólek, aldyna 1 úıir jylqy salyp berdi. Sportshynyń alǵashqy bapkeri Jumahan Turǵambekov pen jeke bapkeri Boranbek Qońyratovqa Haval kóligin mingizdi.
Al bokstan kúmis júldege qol jetkizgen Nurbek Oralbaıǵa kásipker Almas Jalı altyn saǵat syılap úlgerdi. Degenmen bul syı sportshy kóretin qurmettiń alǵysharty ǵana bolýy múmkin. Sebebi boksshyǵa syı kórsetkisi keletinderdiń qarasy qalyń ispetti. Onyń ústine Frantsııadan elge oralǵanyna kóp bola qoımady.
Desek te aıtarlyqtaı qomaqty syılyq almaǵandar da bar. Sonyń biri – sporttyq gımnastıkanyń at snarıadyndaǵy jattyǵýynda kúmis júldeger atanǵan Narıman Qurbanov. Alǵashynda elge kelgende oǵan 1 mln teńgelik sertıfıkat tabystalǵan edi. Ázirge sportshy odan basqa syılyq almaǵanyn aıtyp, aldaǵy ýaqytta júldeger sportshylardyń Prezıdentpen kezdesýinen keıin elenýi múmkin ekenin jetkizipti.
Parıj Olımpıadasynda el namysyn qorǵap, Qazaqstan qorjynyna qola túsirgen dzıýdoshy Ǵusman Qyrǵyzbaevqa Almaty qalasy dzıýdo federatsııasynyń prezıdenti Alı Hamhoev pen QR dzıýdo federatsııasynyń vıtse-prezıdenti Erjan Zaıdınov Toyota Land Cruiser Prado 250 kóligin syılady. Buǵan qosa armııa sportshysy Qyrǵyzbaevqa merziminen buryn «kapıtan» áskerı ataǵy berildi. Aǵa leıtenant Ǵusman Qyrǵyzbaev qazir Qorǵanys mınıstrligine qarasty Ortalyq sport klýbynyń áskerı qyzmetshisi.
Al taǵy qolany alǵan boksshy Nazym Qyzaıbaı da elge áldeqashan oralǵan. Biraq qandaı tartý kórgeni áli beımálim. Biraq buǵan deıin sportshy turatyn kóshede jóndeý jumystary bastalǵany týraly aqparat taraǵan edi. Kóp uzamaı Almaty oblysynyń Qarasaı aýdandyq ákimdigi bul aqparatty joqqa shyǵardy. Úshinshi qola – tarıhı júlde alǵan mergender Aleksandra Le men Islam Sátpaevqa da qandaı syı jasalǵany ázirge belgisiz. Qarýly kúshter sapynda qyzmet atqaratyn Islam Sátpaevqa Qorǵanys mınıstri «El qorǵany» medalimen marapattaǵany belgili boldy. Biraq nagrada ázirshe saltanatty túrde tabystalǵan joq.
Júlde almasa da syı alǵandar
Belgili bir medal alyp, tuǵyrǵa shyǵyp, tý kótermese de ónerimen kópshilikti tánti etken sportshylar bar. Óz kezeginde olar da qur qol qalyp jatqan joq. Mysaly, dzıýdodan áıelder arasynda 48 keli salmaqta júldege bir taban jaqyn bolyp, qola júldege talasta ese jibergen Ábıba Ábýjaqynovaǵa Májilis depýtaty Aıdarbek Qojanazarov «eldiń atynan» dep Kia kóligin syıǵa tartty.
Al Parıj Olımpıadasynda 63,5 keli salmaq dárejesinde el namysyn qorǵaǵan boksshy Muhamedsabyr Bazarbaıulyna aýyldastary at mingizgen. Negizi Bazarbaıuly jarystyń basynan bastap jaqsy óner kórsetip, júldege dámeli favorıtter qatarynda bolǵan edi. Shamasy, aýyldastary bul eńbekti eskergenge uqsaıdy.
Sondaı-aq Parıj Olımpıadasynda sporttyq gımnastıkadan 5-oryn alǵan Ulttyq qurama múshesi Mılad Karımı de 1 mln teńgelik sertıkatqa ıe bolǵan. Sportshy sol kezde kelesi Olımpıada jeńimpaz atanýǵa umtylatynyn aıtqan bolatyn.
Qazaqstannyń ústel tennısi federatsııasy Parıj Olımpıadasynda sheberlik tanytyp, myqtylarmen ıyq tirestire bilgen Kırıll Gerasımenkony marapatsyz qaldyrmaı, eki bólmeli páter berdi. Sebebi Gerasımenko erler arasyndaǵy jekeleı synda 9-oryndy ıelendi. Buǵan deıin qazaqstandyq ústel tennısi sheberleri arasynda mundaı nátıjege qol jetkizgender joq.