Olımpıada júldegeri Elmıra Syzdyqova týǵan kúninde spartakıada jeńimpazy atandy

ALMATY. QazAqparat – Almaty qalasynda Balýan Sholaq atyndaǵy sport saraıynda áıelder kúresinen Qazaqstannyń VI jazǵy spartakıadasy aıaqtaldy, dep habarlaıdy QazAqparat tilshisi.

Aıtýly doda barysynda birneshe dańqty balýan kilemge shyǵyp, ózderiniń áli babynda ekendigin baıqatty.

Rıo olımpıadasynyń qola júldegeri Elmıra Syzdyqova aýyr jaraqattan keıin kilemge qaıta oralyp, jýyrda Frantsııada ótken halyqaralyq týrnırde top jarǵan edi.

Spartakıadada Qaraǵandy oblysynyń namysyn qorǵaǵan E. Syzdyqovanyń 5 aqpan, ıaǵnı búgin týǵan kúni. Ol 76 kg salmaqta astanalyq Gúlmaral Erkebaevamen beldesti. Elmıra 2021 jyly Gúlmaralǵa ese jibergen edi. Asa tartysty ótken básekede bul joly Elmıra qarsylasyn bir ǵana upaı aıyrmashylyǵymen utyp, qarymta qaıtardy.

Sondaı-aq, álem chempıonatynyń eki márte kúmis júldegeri, astanalyq Jámıla Baqbergenova 72 kg salmaqta fınalda batysqazaqstandyq jas balýan Anastasııa Panasovıchti aıqyn basymdylyqpen utty.

Sol sekildi 2008 jylǵy Beıjiń olımpıadasynyń qola júldegeri, Shymkenttiń atynan shyqqan Elena Shalygına 68 kg salmaqta qarsylas shaq keltirgen joq.

Barlyq salmaq dárejeleri boıynsha jeńimpaz-júldegerler anyqtalyp, dıplom, medaldarmen marapattaldy.

Dúısenbi kúni erkin kúres sheberlerine kezek tıedi.

Eske sala keteıik, budan buryn kilemge qaıta oralǵan Almat Kebispaevtyń spartakıada chempıony atanǵanyn jazǵan bolatynbyz.