Olımpıada júldegeri ekenimdi bir kúnnen keıin ǵana sezindim - Ǵusman Qyrǵyzbaev

<p>PARIJ. KAZINFORM &ndash; Osydan bir kún buryn Parıjde ótip jatqan Olımpıada oıyndarynda dzıýdoshy Ǵusman Qyrǵyzbaev el qorjynyna qola medal syılaǵan bolatyn. Búgin ol Kazinform tilishisine eksklıýzıv suhbat berip, ózin alǵash kim quttyqtaǵanyn, jeńisin kimge arnaǵanyn aıtyp berdi.</p>

- Ǵusman Olımpıada júldegeri bolý qandaı sezim syılaıdy eken?

- Medaldi moıynyma taqsam da, júldeger ekenimdi ertesinde, bir kúnnen keıin sezindim.

- Nege bir kúnnen keıin?

- Júldeger atanǵan kúnniń ertesinde jan-jaqtan quttyqtaǵan qońyraýlar qaptap ketti. Telefonymda maza bolmady. Bir qońyraýdyń ústine bir qońyraý qabattalyp jatty. Sonda ǵana baryp, ózimdi «Olımpıada júldegeri ekenmin ǵoı» dep sezine bastadym. Tipti, eldegi jýrnalıster úıime deıin baryp quttyqtap, áke-sheshemnen, bala-shaǵamnan suhbattar jazyp jatypty.

- Eń alǵash sizge quttyqtaý kimnen keldi?

- Eń birinshi Alla qosqan jarym qońyraý shaldy. Ary qaraı ata-anam birge quttyqtady. Olar da televızorǵa telmirip, meniń kúresimdi taǵatsyzdana kútip otyrdy ǵoı. Jeńgen boıda qońyraý shaldy.

- Jeńisińizdi kimge arnaısyz?

- Biz bul medaldi elge alyp bara jatyrmyz. Bul qazaqtyń júldesi. Jeńisimdi elge arnaımyn.

- Qansha bala-shaǵańyz bar?

- Qazirge Qudaı bergen bir ul, bir qyzym bar. Ekeýi de áli kishkentaı.

- Bolashaqta sol balalaryńyzdy ózińiz sııaqty sportshy retinde kórgińiz kele me?

- Árıne, kórgim keledi. Biraq, óse kele, eseıe kele bala ómir jolyn ózderi tańdaıdy ǵoı.

- Negizi, keshe jankúıerler sizdi fınalda kórgisi keldi. Qarsylasyńyzdy utýǵa ne jetpeı qaldy?

- Ózim de solaı oıladym. Men fınalǵa shyǵam dep senip turdym. Biraq, fınal buıyrmady. Eń bastysy qola medalǵa talasta uttym. Bul da Allanyń bergen baǵy dep oılaımyn.

- Siz kúresip jatqanda Eldos kelip qoldaý kórsetti. Bul sizge qanshalyq kúsh berdi?

- Eldos dosymnyń qoldaýy maǵan rýhanı jaqtan óte úlken kúsh syılady. Men tatamıge shyǵarda aqyl keńesin berdi. Jeńesiń dep jigerlendirdi. Men de onyń sózine senip, serpilip qaldym. Men shynymen jeńýim kerek degen ózime ishteı sert ettim. Qola buıyrdy. Bul kórsetkishke jetpeı jatqan qanshama sportshylar bar.

- Keshe «bul meniń sońǵy Olımpıadam bolýy múmkin» dep qaldyńyz. Endi, osy jeńisińizden keıin sporttyq mansabyńyzdy aıaqtaý oıyńyzda bar ma?

- Qazir 30 jastan asyp kettim, kelesi Olımpıadada qyryqqa jaqyndap qalamyz. Artymyzda izimizdi basyp ókshelep kele jatqan inilerimiz kóp qoı. Olarǵa da jol berýimiz kerek. Biraq, búgin-erteń sportty tastaımyn degen oı joq. Ony bapkerlerimmen aqyldasyp sheshetin dúnıe.

- Eger, úlken sporttan ketip jatsańyz nemen aınalysqyńyz keledi?

- Osy suraqty qoıatyn adamdar kóp. Ázirge, eshteńe josparlap jatqan joqpyn. Jalpy, sporttan alystap ketpeımin ǵoı.

Aıta keteıik, Qazaqstan quramasy Olımpıada oıyndaryna sporttyń 25 túrinen 92 joldama jeńip aldy. Naqtyraq aıtsaq, boks, dzıýdo, sportttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tennıs, veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademııalyq esý, kórkem gımnastıka, trıatlon, ústel tennısi, quzǵa shyǵý jáne breıkıngten Olımpıada oıyndarynda synǵa túsedi.

Esterińizge sala keteıik, Frantsııa astanasy Parıj qalasynda ótetin XXXIII jazǵy Olımpıada oıyndary  11 tamyzda máresine jetedi. Oıynǵa álemniń 205 elinen 10 500 sportshy qatysady dep josparlanǵan.