Olımpıada júldegeri Demeý Jadyraev pen eki bapkerine avtokólik syıǵa tartyldy
Frantsııadan elge oralǵan bette týǵan jerine arnaıy atbasyn tiregen dańqty palýan Jarkent qalasynyń ortalyq alańynda halyqtyń ystyq yqylasyna bólendi. Kezdesýge myńnan astam halyq jınaldy. Sportshyny qarsy alýǵa Jetisý oblysy ákiminiń orynbasary Dıas Esdáýletov, aýdan ákimi Marat Saǵymbek, 2008 jylǵy Beıjiń Olımpıadasynyń kúmis júldegeri, palýan Nurbaqyt Teńizbaev, ardagerler, jastar, jalpy aýdan turǵyndary keldi.
Júzdesýde Sotsıalıstik Eńbek Eri Kúlásh Aıtjanova, aýdandyq ardagerler uıymynyń tóraǵasy Toqtarbaı Kerimqulov, sportshy Nurbaqyt Teńizbaev chempıondy Parıj Olımpıadasyndaǵy aıtýly jeńisimen quttyqtap, izgi tilegin bildirdi.
Turǵyndardyń yqylasyna bólengen D.Jadyraev Parıj tórindegi beldesý kezinde qazaqstandyq jankúıerlerdiń, sonyń ishinde týǵan eliniń aq tileýi ózine kúsh bergenin aıtyp, qushaq ashyp qarsy alǵan jerlesterine alǵys aıtty.
«Halyqqa, aýdan turǵyndaryna rızashylyǵymdy bildiremin. Men kópshiliktiń qoldaýyn únemi sezinip kelemin, sondyqtan ár qadamyma jaýapkershilikpen qaraımyn. Budan bylaı da sporttaǵy jolymdy jalǵastyryp, halyqtyń úmitin aqtaımyn dep sendiremin», - dedi D.Jadyraev.
Osy kezdesýde Demeýge avtokóliktiń kilti syıǵa tartyldy. Olımpıadanyń kúmis júldegeriniń alǵashqy bapkeri Jumahan Turǵambekov pen jeke bapkeri Boranbek Qońyratovqa da avtokólik kilti tabystaldy.
Atap ótsek, Qazaqstannyń eńbek sińirgen sport sheberi Demeý Jadyraev 2003-2007 jyldary Taldyqorǵan qalasyndaǵy daryndy balalarǵa arnalǵan sport-ınternatynda oqyǵan.
Buǵan deıin ol Halyqaralyq týrnırler men álem chempıonattarynyń birneshe márte júldegeri bolǵan. Sportpen aınalysyp júrgenine – 20 jyl.