Olımpıada joldamasy, onlaın oqý, eskek esý sportyndaǵy problemalar - álem chempıony Marııa Brovkovanyń bapkerimen suhbat
- Elena Evgenevna, qyzyńyz Marııa birneshe jyldan beri halyqaralyq jarystarda sátti óner kórsetip keledi. Ásirese, ótken jyly Majarstannyń Segeda qalasynda bir adamdyq kanoeda 1 myń metr qashyqtyqta chempıon atandy. Іle-shala 500 metrden qola júldeni jeńip aldy. Al bıyl tabysyn ústemelep, Italııanyń Aýronzo qalasynda S-1 sanatynda 1 myń metrden altyn, 500 metrden kúmis, 200 metrden qola júldege ıe boldy. Osy jeńisterdiń syry qandaı, Marııanyń sporttaǵy qadamy qalaı bastalyp edi?
-Marııa – bizdiń otbasymyzdaǵy ekinshi balamyz. Apasy Anastasııa 27 jasta, sport mektebinde eskek esý sportynan bapker bolyp jumys isteıdi. Marııa kishkentaıynan sport jolyna tústi. Shańǵymen jarysty, qysqy prezıdenttik kópsaıystan sport sheberligine úmitker. Qaıyqqa 6-7 jasynda otyrdy. Áýeli baıdarkada, sosyn 12 jasynan bastap kanoeda jattyǵyp keledi. Jetinshi synypta oblystyq olımpıadalyq rezervtegi mamandandyrylǵan mektep-ınternat kolledjine tústi. Sońǵy eki jylda Qazaqstan jastar quramasymen etene jattyqty, sondyqtan mektepte sırek boldy. Tek emtıhandar tapsyrýǵa keletin. Degenmen memlekettik emtıhandaryn sátti tapsyryp, UBT-dan múdirmeı ótti. Qazir oblys ákiminiń grantymen Jáńgir han atyndaǵy Batys Qazaqstan agrarlyq-tehnıkalyq ýnıversıtetinde dene shynyqtyrý jáne sport mamandyǵynda oqyp jatyr. Sporttaǵy jetistikteriniń barlyǵy da úzbeı ter tógýdiń arqasy dep oılaımyn.
- Sizder sporttyq otbasy boldyńyz ǵoı sonda?
- Qysqasha aıtsam, biz úsheýmiz ǵana sporttamyz. Jubaıym Sergeı Nıkolaevıch Brovkov – qarapaıym eńbekker, avtokran júrgizýshisi.
- Ózińiz bapkerlikpen qashannan beri aınalysyp kelesiz, shákirtterińiz bar shyǵar?
- Árıne, Mahambet Ótemisov atyndaǵy Batys Qazaqstan ýnıversıtetin bitirgen boıda 1998 jyldan beri jattyǵý jumysyndamyn. Bıyl shırek ǵasyr toldy. Osy ýaqyt ishinde eń negizgilerin aıtsam, Azamat Rabaev, Vladıslav Glazkov, Natalıa Donskova Azııa chempıony atandy. Bári de Qazaqstan sport sheberiniń normatıvin oryndady.
- Oral qalasynda eskek esý sportynyń baı tarıhy bar, qazirgi kezde onyń deńgeıi qandaı dep oılaısyz, jýyrda álem chempıonatynan jeńispen oralǵannan keıin oblys ákimi Narıman Tóreǵalıuly qabyldap, qurmet kórsetken kezde Marııanyń ózi de birqatar máseleni aıtyp edi ǵoı?
- Iá, eskek esý sportyna baılanysty óńirde barlyq másele qarjylandyrýǵa kelip tireledi. Oralda tabıǵı jaǵdaı jaqsy, tek alty aı jyly ýaqytta ǵana jattyǵa alamyz. Qys kezinde daıyndyqty úzbes úshin jyly óńirlerge barýǵa týra keledi, buǵan birshama qarjy kerek. Eger qysta ázirlenbesek, basqalardy qýyp jetý qıynǵa soǵady. Bizde jańadan kelip júrgenderge qaıyq pen qural-jabdyq bar. Al joǵary synypty qaıyqtar óte az, altaý ǵana. Marııa bitirgen mektep-ınternattyń ózinde qaıyqtyń jabdyqtary, eskegi jáne ilesip júretin katerleri joq. Birde-bir mektepte jattyǵýdy ótkizýge benzın bólinbeıdi.
- Batys Qazaqstan oblysy tarıhynda eskek esý sportynan alǵash ret Aleksandr Akýnıshnıkovtiń 1986 jyly álem chempıony atanǵany belgili. Sodan keıin Andreı Ergýchev stýdentter arasynda úzdik atandy. Endi, mine, úshinshi bolyp Marııa Brovkova chempıondyq ataqqa qol jetkizip otyr. Basqa kimderden úmit kútesiz?
- Ázirge eshkimdi bólip aıta almaımyn. Biraq 13-14 jastaǵylar arasynda jaqsy balalar ósip keledi. Bálkim, solardyń qatarynan shyǵyp qalar. Kezinde myqty sportshy bolyp, Aq Jaıyqtyń atyn shyǵarǵan Qazaqstannyń eńbek sińirgen jattyqtyrýshysy Aleksandr Akýnıshnıkov qazir de bapkerlik qyzmetinen qol úzgen emes. Andreı Ergýchev Qazaqstan quramasy sapynda jattyǵýda. Solardyń izin jalǵastyratyn jas sportshylar qaýlap shyqsa, keremet bolar edi.
- Ár sportshynyń da armany – olımpıadaǵa barý ǵoı. Osy oraıda bıyl 18-ge tolǵan Marııanyń Parıj joldamasyn jeńip alatyndaı múmkindigi bar ma?
- Eresekter arasynda álem chempıonaty 22-27 tamyzda Germanııanyń Dýısbýrg qalasynda ótedi. Qazir Marııa ulttyq quramamen birge Qyrǵyzstandaǵy Ystyqkólde daıyndalýda. Sodan keıin Eýropaǵa attanady, men tike birinshilikke baramyn. Marııa, osy jarysta lıtsenzııa jeńip alǵysy keledi. Ol óte qıyn, sonysymen baǵaly. Eger álem chempıonatynda sáti túspese, aldaǵy jyly kóktemde lıtsenzııalyq Azııa birinshiligi ótedi, sonda da baq synaıdy. Marııa qatysatyn taǵy bir doda, bıyl qyrkúıekte Qytaıda Azııa oıyndarynda el namysyn abyroımen qorǵamaqqa bel býyp otyr.
- Marııaǵa sport pen oqýdy ushtastyrý qıyn emes pe?
- Árıne, ońaı emes. Tek onlaın túrde bilim alady. Tapsyrmany oryndap, keri jiberedi. Oralǵa kelgen kezde synaqtardy tapsyrady, ázirge bári oıdaǵydaı.
- Marııaǵa aldaǵy jarystarda tek sáttilik tileımiz. Eńbekterińiz jana bersin!
***
Eske sala keteıik, byltyr qazaqstandyq sportshynyń kanoedan jasóspirimder arasynda álem chempıony atanǵanyn jazǵan bolatynbyz.
Sondaı-aq qazaqstandyq jas kanoeshy sol álem chempıonatynda ekinshi medal jeńip aldy.
Al bıylǵy birinshilikte qazaqstandyq eskekshi Marııa Brovkova taǵy da álem chempıony atandy.
Eskekshi Marııa Brovkova álem chempıonatynda bir kúmis jáne bir qola medal jeńip aldy.