Olımpıada: Phenchanda chempıon atanǵan qazaq qyzy Beıjińde júldesiz qaldy

BEIJІŃ. QazAqparat - Belarýs quramasynyń atynan bıatlonnan synǵa túsip júrgen qazaq qyzy Dınara Álimbekova Beıjiń Olımpıadasynda 15 shaqyrymdyq jekeleı synda 5-shi oryn aldy, dep habarlaıdy QazAqparat tilshisi.

Bıatlonshylar básekesinde germanııalyq Denıh Herrman 44:12.7 (0+0, 1+0) nátıjesimen bas júldeni jeńip aldy. Ekinshi oryndy +9.4 (0+0, 0+1) kórsetkishimen frantsııalyq Anaıs Shevale-Býshe qanjyǵasyna baılady. Al úzdik úshinshi orynǵa +15.3 (1+0, 0+1) qorytyndysymen norvegııalyq Marte Olsbıý-Roıselann ıe boldy.

Álimbekova chempıonnan 31,7 sekýnd utylyp, besinshi oryndy mise tutty. Biraq, iz kesý jarysyna joldama alǵan 60 sportshynyń qataryna endi. Demek, aldaǵy ýaqytta medalǵa talasýǵa múmkindigi bar.

Esterińizde bolsa Dınara Álimbekova osydan tórt jyl buryn Ońtústik Koreıanyń Phenchan qalasynda ótken Olımpıada oıyndarynda chempıon atanǵan bolatyn. Onda ol chempıondyq ataqqa bıatlonnan áıelder arasyndaǵy 4h6 shaqyrymdyq estafetalyq jarysta qol jetkizgen bolatyn. Sol tusta Belarýs quramasynda Dınara Álimbekovamen birge Nadejda Skardıno, Irına Krıvko jáne Darıa Domracheva esimdi sportshylar synǵa tústi.

Dınara Álimbekovanyń ákesi – qazaq, aty – Talǵat. Sheshesi – belarýs. Álimbekova 1996 jyly 5 qańtarda Qaraǵandy qalasynyń irgesindegi Abaı aýdanynda dúnıege kelgen. Úsh jasynda Belarýs eline qonys aýdarǵan sportshy qyz kishkentaı kezinen bıatlonmen aınalysady.