Olımpıada, Paralımpıada jáne ulttyq sport túrleri qaıta qarastyrylady

<p>ASTANA. KAZINFORM &ndash; Elimizde Olımpıada, Paralımpıada, Azııa jáne ulttyq sport túrleri joǵary jetistikter sport qataryna kiredi. Bul týraly QR Premer-Mınıstrdiń orynbasary Tamara Dúısenova málim etti.</p>

«Dene shynyqtyrý jáne sport salasynda Memleket basshysy qoıǵan maqsattardy oryndaý úshin kelesi sharalar qabyldanady. Aldymen salany damytýdyń úsh satyly júıesi qurylady. Onyń birinshisi buqaralyq sport, keıingi satylary joǵary jetistikter sportyna qatysty. Joǵary jetistikter sport túrleri qaıta qarastyrylady. Ol tizimge Olımpıada, Azııa, Paralımpıada oıyndary, sondaı-aq, ulttyq sport túrleri kiredi», - dedi Tamara Dúısenova Úkimet otyrysynda. 

Vıtse-premerdiń aıtýynsha, sportqa bólinetin qarjyny nátıjeli ári tıimdi paıdalaný úshin qarjylandyrýdyń jan basyna shaqqandaǵy normatıvi engiziledi. 

«Sport túrleri boıynsha jattyqtyrýshylar men sporttyq medıtsına, farmakologııa, dıetologııa, psıhologııa salasynyń mamandaryn daıyndaý júıesi qaıta qarastyrylady. Ákimdiktermen birlese otyryp aımaqtardaǵy sporttyq ınfraqurylym keńeıtiledi. Bul ózgerister Májiliste qarastyrylyp jatqan zań jobasy aıasynda engiziledi», - deıdi T. Dúısenova. 

Aıta ketsek, keshe Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda sport salasyndaǵy zańnamany jańartýdy tapsyrǵan edi.