Olımpıada oıyndaryna sapaly daıyndalýǵa ýáde beremiz – Myrzaǵalı Aıtjanov

ASTANA. QazAqparat – Bokstan Qazaqstan ulttyq quramasynyń bas bapkeri Myrzaǵalı Aıtjanov Prezıdentke aldaǵy baıraqty básekelerde eldi qýantýǵa ýáde berdi, dep habarlaıdy QazAqparat tilshisi.

«Qurmetti Qasym-Jomart Kemeluly! Jaqynda ǵana Tashkentte ótken álem chempıonatynda sportshylarymyz úlken jetistikke jetti. Bul, ózińiz aıtqandaı, erinbeı eńbek etkenniń, ter tókkenniń arqasynda. Al endi boks salasynyń damýyna, osyndaı úlken jetistikke jetýge birinshi kezekte memleketten jáne Qazaqstan boks federatsııasynyń tarapynan barlyq jaǵdaı jasalǵan», - dedi búgin Aqordada Memleket basshysy Qasym-Jomart Toqaevpen kezdesý kezinde bas bapker Myrzaǵalı Aıtjanov.

Onyń aıtýynsha, alda Qazaqstan boksshylaryn bıylǵy Azııa oıyndary men endigi jyly bolatyn Olımpıada oıyndary kútip tur.

«Elimizdiń boksshylary osy jarystarǵa tyńǵylyqty, sapaly daıyndalyp, elimizdiń, halqymyzdyń, jankúıerlerdiń úmitin aqtaýǵa bar kúshin salady. Erinbeı eńbek etip, ter tógip, elimizdi qýantamyz degen senimmen sizge ýáde beremiz», - dedi bas bapker.

Eske salaıyq, búgin Prezıdent bokstan Qazaqstan erler quramasynyń múshelerin Aqordada qabyldaǵan bolatyn. Kezdesý barysynda Myrzaǵalı Aıtjanov Qasym-Jomart Toqaevqa boks qolǵabyn syılady.

Qazaqstan quramasy Ózbekstanda ótken álem birinshiliginde 4 altyn, 1 kúmis medal jeńip aldy.